"Keimah in tuute’ lutna kongpi ka hi hi"

Catholic Nisim Lai Siangtho, Paska Hun NipiKaal (4) Na, April 26, 2021 (MON)

Lungdamna lai Siangtho (John 10: 1-10)

1. “Ken a man takpi kong genin ah, tuu khumna kongpi pan lut lo a, lampi dang pan kahto-a a lut peuhmah guta buluh ahi hi.2. Kongpi pan a lut mi in tuute a kem tuucing ahi hi.3. Kong cingpa in tuucingpa a kong hon a, tuute in ama aw a za uh hi. Amah in tuute a minin sam a, a pualam ah a paipih hi.4. Amah in a tuute khempeuh a khah khit ciangin a tuute’ mai-ah mapi-in a pai hi. Tuute in ama aw thei uh ahih manin ama nung a zui uh hi.5. Amaute in midang’ nung zui lo dinga, ama kiang pan a taikhia ding uh hi, bang hang hiam cih leh amaute in midangte’ aw thei lo uh hi,” a ci hi.6. Jesu in hih gentehna amaute’ tungah a gen hangin amaute in a khiatna thei lo uh hi.7. Tua ahih manin Jesu in amaute’ kiangah thugen kik a, “Ken a man takpi kong genin ah, keimah in tuute’ lutna kongpi ka hi hi.8. Kei’ ma-a hong paite khempeuh gutate le buluhte ahi uh hi. Ahi zongin tuute in tuate’ aw a ngai kei uh hi.9. Keimah in kongpi ka hi hi. Kei hong tawn-a a lut mi peuhmah lauhuaina tawh kipelh dinga, sungtumin pusuak khia thei ding ahih manin a an nek ding lonona a mu ding hi.10. Gutate in a gu ding, a that ding le a susia ding bekin hong pai uh ahi hi. Kei ka hih leh, amaute in nuntakna ngah tham loin nuntakna a dimtaka a ngahna dingun hong pai ka hi hi.

Hih in Topa' Lungdamna Lai Siangtho ahi hi.