Catholic Nisim Lungdamna Laisiangtho. Paska Hun NipiKaal (3) Na. 29.4.2023(Sat)

John 6:60-69
60. A nungzuite tampi in hih thu a zak uh ciangin, “Hih thu a haksa mahmah hi, kua in sang thei ding ahi hiam?” a ci uh hi.

61. Ahi zongin Jesu in tua thu hangin a nungzuite a phunna thu thei ahih manin amaute’ kiangah, “Hih thu in note lungnop lohna hong neisak ahi hiam?

62. Mihing’ Tapa, ama omna ngei ah a kahtohkik note in mu le-uh cin bang na ci ding uh hiam?

63. Kha in nuntakna hong pia a, pumpi in a kimanna omlo hi. Note’ tunga kong gen thute in kha le nuntakna ahi hi.

64. Ahi zongin note’ lakah a um lo pawlkhat na om lai uh hi,” a ci hi. Bang hang hiam cih leh a kipatcilin amaute kua teng in um lo dinga, kua in lehhek ding cih, Jesu in a thei khol khin zo hi.

65. Tua ciangin amah in, “Hih thu’ hangin ka Pa in phalna thu pia kei leh, ka kiangah kuamah hong pai thei lo hi, kong ci khin zo hi,” a ci hi.

66. Tua hun-a kipanin a nungzui mi tampi kileh kikin Jesu’ nung a zui nawn kei uh hi.

67 Tua ahih manin Jesu in sawm le nihte’ kiangah, “Note in zong kei nong taisan nuam uh hiam?” ci-in a dong hi.

68. Simon Peter in, “Topa aw, kote in kua zuan-a pai ding ka hi uh hiam?

69. Nangmah in nuntak tawntungna thu na nei hi. Nangmah in Pasian’ Mi siangtho na hi hi, ci-in kote in umin kong thei uh hi,” a ci hi.

Hih in Topa' Lungdamna Lai Siangtho ahi hi.