Tangthu Tom

Radio Veritas Asia (RVA) ih cih pen eipau in ci leng huihlak (Radio) pan Asia Gamsung tengah Pasian thu, thuman thutak gen khiatna, tangkona ahi hi. Hih pen Asia Gam sung tenga om Siadaw te kipawlna panin a vaihawmna te a Lianbel Siampipa (Pope Paul VI) ii thukimpih na tawh (11.04.1969)  kum in Philippines Gam Manila Khuapi ah a ki phuan khia ahi hi.  Hih Philippines Gam pan in (Radio) pan kikhah khia in Asia Gam buppi ah pau nam tuam tuam tawh Pasian thu a ki tangko na pen a tom in (RVA) ki ci hi.

India Gam a om Fr. Mark Thang Khan Ai leh Zogam aa om Fr. John Om Se te Philippines Gam ah sangkah in a va kimuh na pan un RVA Zomi- Chin Service mintawh (Radio) huihlak pan Pasian thutangko theih nang hong hanciam uh hi. India Gam aa om Bishop Joseph Mattathany leh Kawlgam aa om Bishop Nicholas Mang Thang te tawh India gam aa om Fr. Mark Thang Khan Ai va kimu in amaute thukimpihna tawh India Gam leh Kawlgam sunga om Zomi te aa dingin (RVA Zomi-Chin Service) pen August 5, 1996 ni-in hong phuan khia zo uh hi.

Hin RVA Zomi-Chin Service pen a ki pat pan ki pan India Gam pan Fr. Mark Thang Khan Ai in Director sem in Kawlgam pan Fr. Anthony Hem Kho Sei in Director semin Sia Francis Lian Khan Pau leh Raymond Khampu tawh mapang khawm uh hi. India Gampan Zou pau leh Kawlgam pan Tedim Pau tawh Pasian thu tangko na kinei in Zomi-Chin Service mintawh kaalkhat sung hun kizang khawm hi.

 Fr. Anthony Hem Kho Sei in kum 2000 dong hong semin tua pan Fr. Dominic Kung Teal in (2000-2009) dong Director hong sem hi. Tua hun sungin Zomi-Chin Service nuai panin 1. Tedim-Chin Service (Tedim-Pau), 2. Falam-Chin Service (Falam-Pau), 3. Hakha –Chin Service (Khalkha pau) leh 4. Mindat- Chin Service (Mindat-pau) cih te tawh Pasian thu tangko theih nang Chin min tawh service (4) behlap thuah ding hong hanciam hi.  Ama hanciamna pen Fr. John Paul Mang Sein Yaw ii Director a sep hun sung 2010 kumin kingah in tua pan ki pan Chin min tawh Service Namnga a ki nei suak hi. Tua hun sung pan kipan (2012) kum bei dong (Zomi-Chin leh Tedim Chin) kipawlin (one week) Nipi kaal-khat sung India leh Kawlgam pan zang khawm in, (Falam-Chin, Hakha- Chin leh Mindat-Chin) hih nam thum teng kipawlin Nipi kaal sung zang khawm uh hi. Tua sungah nikhat in nai lang (30) minutes sung ta hunzatna nei uh hi.

Hakha Diocese pan Kalay Diocese a ki khen khit ciangin Fr. Joseph Pau Lian Kham in (2013-2016) hun sung Director hong sem in tua hun sungin India pan Zomi-Chin Service te tawh zangkhawm nawnlo in Tedim- Chin Service pan (RVA Zomi Tedim TongLuan) ci-in Tedim pau bek tawh kaal-khat sung hun zat zawh na ding hong hanciam hi. Ama hanciam na pen Bishop Felix Lian Khen Thang (Bishop of Kalay) ii thukimpih na leh Philippines Gam aa a sem Fr. Gabriel Htun Myint te ii phalna tawh (2014) kum January kha  pan kipan India Gam a om Zomi- Chin Service te tawh ki pawl (Kaalkhat sung hun zangkhawm) nawnlo in RVA Tedim-Chin Service mintawh (RVA Zomi Tedim Tongluan) ci-in Tedim pau bek tawh kaalkhat bit hunzatna ki nei khia zo hi. Tua hun pan ki pan in India Gam a om (RVA Zomi-Chin Service) pan Zou-pau tawh kaalkhat bup, (RVA Tedim-Chin Service) pan (Tedim tongluan) tawh kaalkhat bup leh (RVA Falam-Chin Service) pan (Falam pau), (RVA Hakha-Chin Service) pan (Khalkha pau), (RVA Mindat Chin Service) pan (Mindat pau) tawh Hakha, Falam leh Mindat kipawl in Kaalkhat bup zang khawm in Chin min bek bek tawh pau nam (5) in Radio pan nikhat in nai lang (30) Minutes sungta Pasian thu tangko na ki nei hi.

(2017) kumpan in khantohna hun tawh kizui-in (Radio) ki tamzat nawnlo a hih manin (Online Service) kipat theihna dingin Philippines Gam ah (Social Media Communication Training) hong bawlin tua sungah Language Service tuam tuam pan a Makai dingin mi khat ta tintan kahin tua sung pan tintan man sa te tawh Language kim pan (Online Service) ki pan khia ta uh hi.

Rev. Fr. Joseph Thang Nen Zo Mung in Philippine Gam pan tintan a man ciangin Director hong sem in RVA Tedim Chin Online Service hong kipan khia hi. A hi zongin (2017) kum bei dongin Radio leh Online zang khawmin Pasian thutangko na ki nei hi. (2018) Kum panin Radio ki zang nawnlo hi. A hi zongin Radio aa a ki zat loh hang Radio zat lai aa mah bangin Nai lang (30) Minutes sung Mobile App pan a kingai thei dingin (Audio Program) a ki bawl khitteh Online Service aa dingin Programs nam (8) ki behlap in aw bek tawh hi nawnlo in Melkimu in Video tawh Online ah Pasian thu tangko na leh hih program nam (8) te ki khah khia den hi.

(2018) kum sungin a nih veina leh a thumvei na (Social Media Training) pen RVA Tedim Service mintawh 1. Anthony Tuang Lian Piang leh 2. Rosa Niang Zam Cing leh Felix Lian Thawn Kim te va kah in Tintan manciang a mauteng in (Full Time Staff) hong sem in nisim in zum  kah den uh hi. Tua ban ah a sem ngei lui teng zong a kisapna mun mun ah huhna a piak theih na dingun ki zawn in a sem ngei teng pen Part Time Staff ci-in ki ciamteh lai uh hi. Tu laitak in a sem lai zum kah den teng pen Full Time Staffs ci-in ki ciamteh in a Sem ngei teng sung pan a nungta lai teng pen a kisap hun hun in huh na a hong piak theih na ding deih na tawh tu dongin Part Time Staffs in ki ciamteh lai uh hi.