“Keimah in Topa ka mu khin hi,”

Catholic Nisim Lai Siangtho, Thawh Kik Pawi Ni, April 4, 2021 (SUN)

Lungdamna lai Siangtho (John 20: 1-15)

1. Nipikal a ni masa ni, zingsang tung khuamial laipi-in Magdala khua mi Mary han ah va hawh a, han kong khakna suang kilikkhiasa-a om a mu hi.2. Tua ahih manin Simon Peter le Jesu in a it a nungzuipipa’ kiangah amah va tai a, “Amaute in han sung pan Topa a lakhia zo uh hi. Koi lai-ah koih uh ahi hiam, ka thei kei hi,” ci-in a gen hi.3. Tua ciangin Peter le adang nungzuipipa paikhia uh a, han lamah a pai uh hi.4. A nih-un taikhawm uh a, ahi zongin tua adang nungzuipipa in Peter makhelhin han a tung masa hi.5. Amah kunsukin a sung a et ciangin tua lai-a om saihadial puan kizialte a mu hi. Ahi zongin amah han sungah lut lo hi.6. Tua khit ciangin a nunga om Simon Peter a tun ciangin, han sungah lut a, a luang tuamna saihadial puan a mu hi.7. Tua saihadial puan a lu tuamna puan tawh omkhawm loin a tuamtuakin kizialin a om a mu hi.8. Tua ciangin han a tung masa adang nungzuipipa zong han sungah lut a, a muh ciangin a um hi.9. Bang hang hiam cih leh, amaute in tua hun dong, Lai Siangtho in, amah sihna pan a thokik ding hi, a cihna thu theitel nai lo uh hi.10. Tua khit ciangin nungzuipite amau inn ciat ah a ciahkik uh hi.11. Ahi zongin Mary han pualam ah dingin a kap hi. A kahkawmin kunsukin han sung en a,12. puanpak silh vantung mi nih, Jesu’ luang a kisialna mun, a lukhung ah khat, a khekhuantaw ah khat a tu a mu hi.13. Amaute in, “Numei aw, bang hangin kap na hi hiam?” ci-in a dong uh hi. Mary in, “Ka Topa lakhiamang uh a, koi-ah koih uh ahi hiam, ka thei kei hi,” a ci hi.14. Tua banga a gen khit ciangin a nunglam a kihei leh, a nunga ding Jesu a mu hi; ahi zongin Jesu ahih lam thei lo hi.15. Jesu in ama kiangah, “Numei aw, bang hangin kap na hi hiam? Kua zong na hi hiam?” ci-in a dong hi. Mary in amah huan cingpa sa-a, “Sia aw, amah na puakkhiat mang ahih leh na koihna kei’ kiangah hong gen in. Keimah in ka va la ding hi,” a ci hi.16. Jesu in, “Mary aw,” ci-in sam a, Mary kihei-in, Hebrew kamin, “Rabboni,” ci-in a dawng hi. (Rabboni a khiatna in , ‘Sia’ a cihna ahi hi.)17. Jesu in ama kiangah, “Hong len kei in. Bang hang hiam cih leh, ka Pa’ kiangah ka kahto nai kei hi. Ahi zongin Ka sanggamte’ kiangah va pai inla, ka Pa ahi note’ Pa, ka Pasian ahi note’ Pasian’ kiangah ka kahtoh ding thu amaute’ kiangah va gen in,” ci-in a sawl hi.18. Magdala khua mi Mary zong va pai a, “Keimah in Topa ka mu khin hi,” ci-in a nungzuipite’ kiangah gen a, Jesu in ama tunga a gen thu khempeuh amaute a ko hi.

Hih in Topa' Lungdamna Lai Siangtho ahi hi.