“Tua pa bangin kuamah in thu gen ngei lo hi”

Catholic Nisim Lai Siangtho, Zehtan Hun Sungah Nipi Kaal Lina, March 20, 2021 (SAT)

Lungdamna lai Siangtho (John 7: 40-53)

40. Mihonpi kimkhat in tua thute a zak uh ciangin, “Hih pa pen kamsangpa ahi takpi hi,” a ci uh hi.41. Pawlkhat in, “Amah, Christu ahi hi,” a ci uh hi. Ahi zongin adang pawlkhatte leuleu in, “Bangci-a, Galilee pan Christu hong piang thei ding ahi hiam?42. Christu pen David’ suan pan le David’ teenna Bethlehem khua pan hong piang ding hi, ci-in Lai Siangtho in gen hilo ahi hiam?” a ci uh hi.43. Tua ahih manin, ama hangin mihonpite’ sungah kikhenna a om hi.44. Pawlkhatte in amah a man nuam uh hi, ahi zongin kuamah in ama tungah khut a nga ngam kei hi.45. Tua khit ciang in siampi makaite le Pharisee-te’ kiangah biakinn cing palikte a ciahkik uh ciangin, “Bang hangin amah hong paipih lo na hi uh hiam?” ci-in amaute in a dong uh hi.46. Biakinn cing palikte in, “Tua pa bangin kuamah in thu gen ngei lo hi,” a ci uh hi.47. Tua ciangin, Pharisee-te in, “Note zong hong khem zo ta ahi hiam?48. Eite’ thuneite’ lakah ahi zongin, Pharisee-te’ lakah ahi zongin khatpeuh in amah um uh ahi hiam?49. Ahi zongin hih mihonte in Thukham theilo uh ahih manin hamsiatna a thuak uh ahi hi,” a ci uh hi.50. Amaute’ laka khat ahi, ni danga Jesu’ kianga hong pai ngei Nicodemus in,51. “Eite’ Thukham sung ah mi khat’ thu za masa lo, a gamtatna kantel masa lopi-in amah mawhsakin thu kikhen ngei ahi hiam?” a ci hi.52. Amaute in, “Nang zong Galilee mi na hi hiam? En lecin, Galilee panin kamsang hong piang lo hi, cih na mu ding hi,” a ci uh hi.53. Tua ciangin, amaute khempeuh amau inn ciat ah a ciah uh hi.

Hih in Topa' Lungdamna Lai Siangtho ahi hi.