"Nangma min amaute ka theisak zo a, ka theisak lai ding hi"

Catholic Nisim Lai Siangtho, Paska Hun NipiKaal (7) Na, May 20, 2021 (THURS)

Lungdamna lai Siangtho (John 17: 20-26)

20. “Keimah in amaute’ aading bekin thu kong ngen kei hi. Amaute’ thuhilhna hangin kei hong um mite’ tang dingin zong thu kong ngen hi.21. Pa aw, kei sungah nang na om a, nang sungah kei ka om mah bangin amaute pum khat a suah theihna dingun thu kong ngen hi. Nangmah in kei nong sawl ahih lam leitungin a upna dingin amaute zong eima sung ah omin pum khat a suahna dingun thu kong ngen hi.22. Eite pum khat ihih mah bangin amaute zong khat ahih theihna dingun nong piaksa minthanna amaute ka pia zo hi.23. Amaute’ sungah kei ka om a, kei’ sungah nang na om mah bangin amaute pum khat a suahna a kicing ding hi. Tua bangin nangmah in kei nong sawl a, kei nong it mah bangin amaute na it hi, cih leitung in a theihna dingin, nong piaksa minthanna amaute’tungah ka pia zo hi.24. Pa aw, leitung pian ma-a nong itna tawh kei nong piak minthanna, nong piaksa mite in zong a muh theihna dingun keima omna munah amaute hong om ding ka deih hi.25. “A dik ka Pa aw, leitung in nang hong thei kei zongin, keimah in nang kong thei hi. Nangmah in kei hong sawl na hihna thu zong amaute in a thei uh hi.26. Keima tunga nong itna amaute’ sungah omsakin, keimah in amaute’ sungah ka omna dingin, nangma min amaute ka theisak zo a, ka theisak lai ding hi,” a ci hi.

Hih in Topa' Lungdamna Lai Siangtho ahi hi.