"Mangbuhte la unla, ka ansal sungah na koih un"

Catholic Nisim Lai Siangtho, Hun Nautaang NipiKaal (16) Na, July 24, 2021 (SAT)

Lungdamna lai Siangtho (Matthew 13: 24-30)

24. Jesu in thugentehna dang khat gen a, “Vantung gam pen ama lo sunga khaici hoih a vawhpa tawh kibang hi.25. Ahi zongin mite a ihmut kalin a galpa va pai-in mangbuh kivawhna lakah tahum a vawh khit ciangin a paikhia hi.26. Tua ahih manin a kungte hong khanga, mangbuh a vuih ciangin, tahum zong hong kilang hi.27. Lo neipa’ kiangah nasemte hong pai-in, ‘Sia aw, na lo sungah khaici hoih vawh hilo na hi hiam? Tua hi napi-in hih tahumte koi pan a hong pai ahi hiam?’ a ci uh hi.28. Lo neipa in, ‘Galpa’ vawh ahi hi,’ ci-in a dawng hi. Nasemte in ama kiangah, ‘Kote va kuanin ka bawhkhiat ding uh na phal hiam?’ ci-in a dong uh hi.29. Ahi zongin lo neipa in, ‘Va bot nai kei un. Tahumte bot le-uh cin mangbuh tawh na bot khawm kha ding uh hi.30. Anlak hun matengin a nam nihin po khawm phot tadih hen. Anlak hun ciangin anlate’ kiangah, Tahumte bot masa unla, meikhuk ah khultum dingin lom hen un; tua khit ciangin mangbuhte la unla, ka ansal sungah na koih un,’ a ci ding hi,” a ci hi.

Hih in Topa' Lungdamna Lai Siangtho ahi hi.