"Keimah in tuute’ aading ka nuntakna ka pia hi"

Catholic Nisim Lai Siangtho, Paska Hun Nipi (4) Na, April 25, 2021 (SUN)

Lungdamna lai Siangtho (John 10: 11-18)

11. Keimah in tuucing hoihpa ka hi hi. Tuucing hoihpa in a tuute’ aadingin a nuntakna a pia ngam hi.12. Tuucing hilo, tuu neipa zong ahi lo, a kicial tuucingpa in, ngia hong pai a muh ciangin tuute nusia-in taisan a, ngia in tuute manin, tuuhonte a kithehthang sak hi.13. Amah in a kicial ahih manin, tuute don loin a taisan hi.14. Keimah in tuucing hoihpa ka hi hi. Ka tuute ka thei a, ka tuute in kei hong thei uh hi.15. Ka Pa in kei hong thei a, ken zong ka Pa ka thei hi. Keimah in tuute’ aading ka nuntakna ka pia hi.16. Hih tuu khumna sunga om lo tuu dang zong ka nei lai hi. Tua tuute zong kong paipih lai ding hi. Amaute in ka aw ngai ding uh hi. Tua ahih manin tuuhon khat, tuucing khat a om ding hi.17. Hih thu’ hangin ka Pa in kei hong it hi, bang hang hiam cih leh keimah in ka lakkik dingin ka nuntakna ka piakkhiatna hang ahi hi.18. Kuamah in ka nuntakna ka tung panin hong sut zo lo hi, ahi zongin keima utthu-in ka piakhia hi. Ka nuntakna piakkhiat theihna le lakkik theihna ding thuneihna ka nei hi. Tua thuneihna ka Pa’ kiang panin ka ngah khin zo hi,” a ci hi.

Hih in Topa' Lungdamna Lai Siangtho ahi hi.