"Keimah in amaute’ aadingin kei le kei ki-apin ka kisiansuah hi"

Catholic Nisim Lai Siangtho, Paska Hun NipiKaal (7) Na, May 19, 2021 (WED)

Lungdamna lai Siangtho (John 17: 11-19)

11. Tu-in nangma kiangah kei kong pai ta dinga, hih leitung ah ka om nawn kei ding hi. Ahi zongin amaute leitung ah a om lai ding uh hi. A Siangtho Pa aw, nang le kei pum khat ihih mah bangin, kei nong piaksa ahi amaute zong pum khat a suahna dingun nangma min tawh amaute na kem in.12. Amaute tawh ka omkhop laitakin, nong piaksa mite nangma min tawh ka kem zo a; amaute ka cing zo hi. Lai Siangtho a tangtunna dingin amaute’ lakah kisiatnapa khat longal a dang khat beek kisia lo hi.13. Ahi zongin tu-in keimah in nangma kiangah kong pai ta ding hi. Keima lungdamna amaute’ sungah a kicinna dingin leitunga ka om lai-in keimah in hih thute ka gen hi.14. Keimah in na thu amaute ka pia khin hi. Keimah in leitung tawh ka kipawl loh bangin, amaute zong leitung tawh kipawl lo uh ahih manin, leitung in amaute a mudah hi.15. Amaute leitung pan na lakkhiatna dingin thu kong ngen kei hi. Ahi zongin amaute mi gilopa’ kiang pan na dalna dingin thu kong ngen hi.16. Keimah in leitung tawh ka kipawl loh bangin, amaute zong leitung tawh kipawl lo uh hi.17. Amaute thuman thutak sung ah na siangthosak in. Nangma thu in thuman thutak ahi hi.18. Nangmah in leitung ah kei nong sawl mah bangin, amaute leitung ah ka sawl hi.19. Amaute zong thuman thutak sungah ki-apin a kisiansuahna dingun, keimah in amaute’ aadingin kei le kei ki-apin ka kisiansuah hi.

Hih in Topa' Lungdamna Lai Siangtho ahi hi.