"Ka Pa in a sehsa mite’ aading bek ahi hi"

Catholic Nisim Lai Siangtho, Zehtan Hun Sungah Nipi Kaal Nih na, March 3, 2021 (WED)

Lungdamna lai Siangtho (Matthew 20: 17-28)

17. Jerusalem lam zuanin Jesu a paitoh laitakin nungzui sawm le nihte a tuamin tonpih a, amaute’ kiangah,18. “En un, Jerusalem ah a paito ihi hi. Siampi makaite le lai siangtho siamte’ khut sungah Mihing’ Tapa hong ki-ap dinga, amaute in amah a sihna dingin thu a khen ding uh hi.19. Tua ciangin amaute in amah zahko-in selpho ding uh a, satin singlamteh tungah a khaina dingun Gentile mite’ khut sungah a ap ding uh hi; a ni thum ni-in a thokik ding hi,” ci-in a gen hi.20. Tua khit ciangin Zebedee(b) tate’ nu, a tate tawh a kibangin a kiangah va pai uh a, a mai-ah khukdin-in maipha a ngen hi.21. Jesu in tua nu kiangah, “Bang deih na hi hiam?” ci-in a dong hi. Amah in, “Na gam sungah hih ka tapate nih, khat na taklam ah, khat na veilam ah a tutna dingun thu hong piaksak in,” a ci hi.22. Ahi zongin Jesu in, “Na nget uh na thei kei uh hi. Ka dawn ding hai note in dawn zo ding na hi uh hiam?” a ci hi. Amaute in, “Ka dawn zo ding uh hi,” a ci uh hi.23. Amah in amaute’ kiangah, “Keima hai na dawn takpi ding uh hi, ahi zongin ka taklam le ka veilam-a tut theihna ding thu pen kei’ kong piak theih hi lo hi. Ka Pa in a sehsa mite’ aading bek ahi hi,” a ci hi.24. Nungzuipi adang sawmte in hih thu a zak uh ciangin, tua unaute nih’ tungah a heh uh hi.25. Ahi zongin Jesu in amaute sam a, “Gentile gam a ukte in mipite’ tungah kiliansak uh a, a uliante in a tung uh ah a kithuneih sakna thu na thei uh hi.26. Note’ lakah tua bang hi lo ding hi; ahi zongin note’ lakah a lian a suak nuam peuhmah note’ nasem hi dinga,27. note’ lakah a masa nuam peuhmah note’ sila hi ding hi;28. Mihing’ Tapa in midangte ama na a semsak dingin hong pai hilo a, midangte’ na a sem ding le mitampi a hotkhiatna dingin ama nuntakna a pia dinga hong pai ahi hi,” a ci hi.

Hih in Topa' Lungdamna Lai Siangtho ahi hi.