"Jesu in naupangnote tawi a, amaute’ tungah a khut nga-in thupha apia hi."

Catholic Nisim LaiSiangtho, Hun Nautaang NipiKaal (27) Na, October 3, 2021 (SUN)
Lungdamna lai Siangtho (Mark 10: 2-16)

2. Pharisee-te pawlkhat va pai uh a, Jesu a ze-etna dingun, “Pasal khat in a zi a mak ding thukham tawh kituak ahi hiam?” ci-in a dong uh hi.3. Jesu in amaute’kiangah, “Moses in note’ tung ah bang thu hong pia ahi hiam?” a ci hi.4. Amaute in, “Pasal khat in makna lai atin, a zi mak ding Moses in a phal hi,” a ci uh hi.5. Ahi zongin Jesu in amaute’ kiangah, “Na lungtang uh khauh lua ahih manin Moses in hih thukham note’ aadingin a gelh ahi hi.6. Ahi zongin Pasian in na khempeuh a piansak cilin pasal le numei a piangsak hi.7. Tua thu’ hangin pasal in a nu a pa nusia-in a zi tawh a kiteeng ding hi.8. Amaute gel in ci khat pum khat a suak ding uh hi. Tua ahih manin amaute in nih hi nawn loin pum khat ahi hi.9. Tua ahih manin Pasian’ gawmsate kuamah in khen kei ta hen,” ci-in thu a pia hi.10. Tua khit ciangin inn sungah amaute a om laitakun a nungzuite in hih thu a dong kik uh hi.11. Jesu in amaute’ kiangah, “Mi khatpeuh in a zi ma a, numei dang tawh a kiteen leh a zi’ tungah a mawh hi-in numei le pasal mawhnao a bawl ahi hi.12. Tua ciangin numei khat in a pasal ma-a pasal dang khat a teenpih leh numei le pasal mawhna a bawl ahi hi,” ci-in a dawng hi.13. Tua khit ciangin mite in a naupangnote uh a lawnsak ding deihin Jesu’ kiangah hong paipih uh a, a nungzuite in amaute khauhtakin a kham uh hi.14. Ahi zongin Jesu in hih thu a muh ciangin heh a, amaute’ kiangah “Naupangnote ka kiangah hong paisak un. Amaute khaktan kei un. Bang hang hiam cih leh Pasian’ gam in tua bang mite’ gam ahi hi.15. Ken a man takpi kong genin ah, naupangno khat bangin Pasian’ gam a sang lo mi peuhmah tua gam sungah lut ngei lo ding hi,” a ci hi.16. Tua khit ciangin Jesu in naupangnote tawi a, amaute’ tungah a khut nga-in thupha a pia hi.

Hih in Topa' Lungdamna Lai Siangtho ahi hi.