"Ama thugentehnate a zak uh ciangin amau thu a genna ahih lam a thei uh hi"

Catholic Nisim Lai Siangtho, Zehtan Hun Sungah Nipi Kaal Nih na, March 5, 2021(FRI)

Lungdamna lai Siangtho (Matthew 21: 33-43, 45-46)

33. (d)“A dang thugentehna khat na ngai un. Leitang neipa khat in huan bawlin leenggui suan a, a kimkotah dai kai-in um a, leenggahzu sukna dingin dum a to hi. Amah in a honna dingin tausang khat zong a bawl hi. Tua khit ciangin a leenggah huan lokhawhlawhte semsak a, gam dangah a zinsan hi.34. Leenggah a min hun a tun’ ciangin, ama ngah ding teng a va la dingin a nasemte lokhawhlawhte’ kiangah a sawl hi.35. Ahi zongin lokhawhlawhte in tua a nasemte khat sat gawpin, khat that uh a, khat suang tawh a deng gawp uh hi.36. Tua ciangin loneipa in a masa sangin a nasem a tamzaw sawl leuleu a, lokhawhlawhte in tuate zong a masate mah bangin a bawlsia uh hi.37. A tawpkhakna ah amah in ka tapa paisak le’ng amaute in na zahtak buang ding uh hi, ci-in amaute’ kiangah a tapa a paisak hi.38. Ahi zongin lokhawhlawhte in a tapa a muh uh ciangin, ‘Hihpa in a innluahpa ahi hi. Hong pai un, amah thatin a luah ding teng laksak ni, a kici uh hi.39. Tua ahih manin amaute in amah man uh a, dai pua ah kaikhia-in a that uh hi.40. Tu-in loneipa hong pai ciangin, lokhawhlawhte a bangci bawl ding hiam?’ ci-in a dong hi.41. Amaute in, ‘Amah in tua migilote sihsia-in sisak dinga, a lo zong ama ngahzah ding a hun hunin a pia ding lokhawhlawh dangte a khosak ding hi,’ ci-in a dawng uh hi.42. Jesu in amaute’ kiangah, “ ‘Inn lamte in a nilkhiat uh suang in innkiu suang bulpi a suak khin hi; hih thu Topa’ bawl hi-in, eite’ muh a thu piang na lamdang ahi hi,’ cih thu Lai Siangtho sungah sim ngeilo na hi uh hiam?43. Tua ahih manin, note kong genin ah, ‘Note’ kiang panin Pasian’ gam kilakhia dinga, vantung gam tawh kituak gah a gah ding mite’ tungah kipia ding hi. 45. Siampi makaite le Pharisee-te* in ama thugentehnate a zak uh ciangin amau thu a genna ahih lam a thei uh hi.46. Amaute in Jesu a mat theihna ding thu a zon uh hangin mipite in amah kamsang khatin sang uh ahih manin mipite a kihtak manun a man ngam kei uh hi.

Hih in Topa' Lungdamna Lai Siangtho ahi hi.