“Pai in, na upna in nang hong damsak zo hi”

Catholic Nisim Lai Siangtho, Hun Nautaang NipiKaal (8) Na, May 27, 2021 (THURS)

Lungdamna lai Siangtho (Mark 10: 46-52)

46. Tua khit ciangin amaute Jericho khuapi a tung uh hi. Jesu le a nungzuite in mihon tampi tawh tua khuapi pan a paikhiat laitakun Timaeus’ tapa Bartimaeus a min nei, mittaw khut dawhngen khat lam gei-ah a na tu hi.47. Amah in Nazareth mi Jesu ahihna thu a zak ciangin, “David’ Tapa, Jesu aw, kei hong hehpih in,” ci-in a kiko hi.48. Mi tampi in amah taai uh a, daitak-a a omna dingin a gen uh hi. Ahi zongin tua pa in, “David’ Tapa aw, kei hong hehpih in!” ci-in a kiko semsem hi.49. Jesu khawl a, “Amah sam un,” a ci hi. Tua ciangin amaute in mittawpa sam uh a, “Kilung nuamsak inla, ding in! Amah in nang hong sam hi,” ci-in a sam uh hi.50. Tua ahih manin amah in a puan paikhia-in dingto-a Jesu’ kiangah a paipah hi.51. Jesu in ama kiangah, “Bang kong hihsak ding deih na hi hiam?” ci-in amah a dong hi. Tua mittawpa in, “Topa aw, khua ka mu thei kik nuam hi,” a ci hi.52. Jesu in ama kiangah, “Pai in, na upna in nang hong damsak zo hi,” a ci hi. Tua khit phetin amah in khua mu thei pah a, lampi ah Jesu’ nung a zui hi.

Hih in Topa' Lungdamna Lai Siangtho ahi hi.