“Kuamah in na gah ne ngei nawn kei ta hen”

Catholic Nisim Lai Siangtho, Hun Nautaang NipiKaal (8) Na, May 28, 2021 (FRI)

Lungdamna lai Siangtho (Mark 11: 11-26)

11. Tua khit ciangin Jerusalem khua biakinnpi sungah Jesu a lut hi, amah in na khempeuh a veel kawikawi khit ciangin, nitum ta ahih manin sawm le nihte tawh Bethany khua ah a pai uh hi.12. A zing ciangin Bethany khua pan a paikhiat laitakin Jesu a gil a kial hi.13. Theikung a teh pha khat a galmuh ciangin, a gah hiam, ci-in theivil dingin a pai hi. Thei phung a tun ciangin a teh simloh bangmah om lo hi. Bang hang hiam cih leh, thei gah hun hi lo hi.14. Tua ciangin amah in theikung’ kiangah, “Kuamah in na gah ne ngei nawn kei ta hen,” a ci hi. A nungzuite in zong tua a cih a za uh hi.15. Tua khit ciangin Jerusalem khua a tun’ uh ciangin biakinnpi sungah Jesu lut a, tua lai-a sum lei sum zuakte a hawlkhia hi. Sum khekte’ sabuaite le vakhu zuakte’ tut-phahsaute sawnpai gawpin,16. biakinnpi’ sungah van khat nangawn, kuamah in a paipih lohna dingin a kham hi.17. Amah in amaute’ kiangah, “Ka inn in minam khempeuhte’ thungetna inn kici ding hi, ci-in Lai Siangtho sungah kigelh hilo ahi hiam? Ahi zongin note in tua inn guta buluhte’ omna na suaksak uh hi,” a ci hi.18. Tua ciangin siampi makaite le lai siangtho siamte in a zak uh ciangin, Jesu thahna ding thu a zong uh hi. Bang hang hiam cih leh, mihonpite khempeuh in Jesu’ thuhilhna lamdangsa mahmah uh ahih manin, amaute in amah a kihta uh hi.19. Nitak hong tun ciangin Jesu le a nungzuite khuapi panin a paikhia uh hi.20. A zingsang ciangin amaute a pai laitakun tua theikung a zung a kipan a dinggaw-a om a mu uh hi.21. Peter in phawk a Jesu’ kiangah, “Rabbi aw, en in! Na samsiat theikung in kungkeu hi!” ci-in a gen hi.22. Jesu in amaute’ kiangah, “Pasian um un.23. Ken a man takpi kong genin ah, mi khatpeuh in a lungsim sungah uplahna nei loin, ama cih bangin piang ding, ci-in a up leh, hih mual’ kiangah, ‘Na omna pan kikhinkhia inla, tuipi sung ah tuaksuk in,’ a cih leh, a cih mah bangin a piang ding hi.24. Tua ahih manin, note’ kiangah kong genin ah, thu na nget uh ciangin na nget khempeuh uh ngah ding, cih na up uh leh, na ngah ding uh hi.25. Note dingin thu na nget uh ciangin, midang peuhmah tungah lungkim lohna na neih uh leh a mawhna na maisak un; na maisak uh leh vantunga om na Pa un zong note’ mawhnate hong maisak ding hi.26. Ahi zongin na maisak kei uh leh vantunga om na Pa un note’ mawhnate zong hong maisak lo ding hi,” a ci hi.

Hih in Topa' Lungdamna Lai Siangtho ahi hi.