Pasian Piak Leitung Gamh (Vol-1)

Pasian piak leitung gamh Kilemna cih ciangin kiim leh paam kep cing ding zong ahi hi. Pasian in leitungah na khempeuh a ki cing takin mihingte letsong hong pia hi. Tua letsong in manpha mahmah ahih manin, nuntakna nei eite khempeuh ading leh hong piang lai ding tu leh ta te adingin ih cing ih kep ding thupi hi. Pasian in ama bawlsa na khempeuh ii hoihna mu hi. Hoih zong hoih takpi hi. Tua ahih manin singkung, lopa, paak tuamtuam te, ganhing tuamtuam te leh nuntakna a nei na khempeuh zahtak ding, kep siam ding, a ki sam bangin zat siam ding kul hi. Tua nate khempeuh pen ei mihing te in a kibangin hawm siam in zat siam ding zong ki sam hi.

Pasian piansak nate mawk zatna, suksiatna, a siangtho lo in bawlna te in tua te a bawl Pasian simmawhna tawh ki bang hi.  Mihingte tungah thuman loh na leh khialhna zong ahi hi. “Eite’ lam etna in hong suak lai ding ih tu ih ta te, khanpha in a nuntak theih na ding uh, amaute’ nuai aa om lopa te a khe uh tawh a sikkhak na ding uh, huih siangtho a diik khak na ding uh, a siangtho gunpi tungah gunkuang tuangin a pai theih na ding uh leh a minthang ngasa te zong neih theih nading uh ahi hi.” (Jacques Cousteau)

Pasian hong piak thupha phualpi pen ama deih bangin a susia mite in a inn veng te a dodo tawh ki bang hi. A sanggam tungah zong guta buluh tawh a ki bang ahi hi. Tu leh ta te gamh piak zawhloh banah amah mah zong genthei sak hi. “Ama tunga teengte in leitung ninsak uh hi; bang hang hiam cih leh amaute in thukhamte palsatin, ngeina kipte zui lo uh a, tawntung thuciamna peel uh hi.” Isaiah.24:5

Mihingte in ki lem na, nek leh dawn ki cingin nuamtakin ih om nop leh leitung ah ki lem na, nek leh dawn, neih leh lamh a ki cing nangin ih sep kul hi. Tua banah leitung ii tu leh ta te ahi, huih lak vasa te, gam sung singkung te, tui sung a om ngasa te, lopa te, gam sa te hoih tak in koih kul hi. Adang nuntakna nei te hoih takin a nuntak theih ciang bekin mihing te nuamtakin ki nungta thei pan ding hi. Tua ahih manin a nungta gan hing, sing kung lopa te kep cing ding ki sam aa, tui, huih, lei tangte zong siangtho takin ih koih ding kisam hi. Ki lemna zong a om kul hi. Ih diik huih in a singtho ahih ding kisam hi. Singkung te zong a khantoh ding ki sam aa, tui te zong a siangtho ding ki sam hi. (Thomas Berry)