A Manpha Penpen Gamh

RVA a za a ngai nu leh pa, lawm leh gualte aw tuni ih ki kup dingin innkuan thu cih thulu nuaiah “A Manpha penpen Gamh Piakna” cih thulu tawh holung kum khawm ni! Ei Zomi te-in Gamh luah za cih pen ki thupi sak mahmah hi. Ih pu leh ih Pa te tungpan aa hong kipia neih leh lamh a gen na uh in GAMH cih ahi hi. Nang leh kei-in bang gamh hong ki pia in, bang gamh luah ding in ih tate tungah bangpia ding cih ki ngaih sun ni.
Leitungah khan tohna ding bekbek mah ki vai hawmin Mikang ten bang na ci hiam cih leh mailam nuntak a nop nading in naupangte pilna man guan in na ci uh hi. Naupangte pilna man a guan gam khat, khua khat leh innkuan khat pen a mailam nuntak zia dinguh hong nuamin a en huai mahmah te hong hi ding uh hi.

Pau 22:6 Naupangte lampi man a tunna dingin hilh in; tua hi leh a teek dongin lam khialin pial nawn lo ding uh hi. Naupangte lampi man hilh ding ih mu hi. Paunak 1:7 Topa zahtakna in pilna kipatna hi a, mihaite in pilna le thuhilhna don lo uh hi.
Khai ci ih vawh ciangin mehgah mehteh ki lo thei pah lo aa, a gol a liat khit cingin gui leh gahte hong nei thei pan ahi mah bangin Naupangte thuman leh pilna man tawh pattahna in a nungak a tangval uh ciangin pilna tawh na hoih hong sem aa tua hun ciangin a nu leh pa, pawlpi, a khuapih tuipih le gam leh lei in phattuam na ngah in thaman a gah alo thei hong hi pan uh hi.
Pau 10:1 “Ta pil in a pa lungdamsak a, ta hai in a nu dahsak hi.” Ci-in Paunak Lai Siangtho sungah ih mu thei hi. Leitungah lungnopna leh lungdamna ding zongin mitampi te vak suk vak to uh hi. Lungdamna leh lungnopna ih cih pen a gamla pi pan in hongpai hilo aa ei leh ei, ih innkuan sung leh ih kiim leh paam pan in hongpai/hong piang ahi hi. Nu leh Pa ten a tate uh tungah pilna siamna pen a hih theih zahzah un pia in tate in zong a masa penpen in nu leh pa tungpan pilna ngah masa pen uh hi. Nu leh pa te hilh banah Biakna pan ahi zongin, Ki pawlna tuamtuam pan leh kumpi pan in naupangte leh khangnoten  pilna siamna a neihna dingun ki sem tek hi.
Ta pil leh tanu pil a nei nu leh pa te pen a lawm leh gualte lakah ki angtang sak mahmah uh hi. Tu ma kum nih lai in mo leina khatah ka va pai leh innteek thusung/tamsi ih cih mo kileina thu kigen a dawngkik pa in bang hong gen hiam cih leh “nong mo lak uh pen a neu lai aa kipan pilna sin sak in sang kahkah sak hi ung, leitung pilna Degree ngah in nasep zong nung kum deuhin hong ngah hi, a lian penpen leh a thupi penpen kong mo ken sak dinguh pen tua hi, himah tase leh no a zang dingten na zat theih uh leh a hampha innkuan mo nei na hi uh hi” ci in thu vaikhakna hong nei hi. Thu gen pa zong ki angtang sak mahmah ahi ding in ka mu hi.
Hih a tung aa thu ih et ciangin pilna piakna in mo ken manpha penpen ahih leh ih tate pilna siamna guanine hi leng moken manpha penpen mah bangin gamh luah ding a manpha penpen apia hi ding hi hang. India gam suahtaakna a ngah nangin a makai Mahatma Gandhi in pilna a sin theihna dingin silh leh teen mi aa eng vet lo in, a mau neihsa ahi a nu gatsak puan bek tawh sang kah in pilna na zong hi. Mi te in tualpuan silh ci-in gen sia mah tase leh amah in bangmah phamawh sa se lo-in a thupi penpen ahi a pil sin na ah a gual zawh theihna dingin han ciam hi.
Mi kangte in bang na ci hiam cih leh “Education is the only solution for the future.” Pilna ih cih in mailam nuntak na a huzo/ mailam nuntak zia ding lam hong lak khat ahi hi na ci uh hi. Nu leh Pa lawm leh gualte, pilna ih cih in midangte suh theih loh leh guk sak theih loh, a manpha mahmah neih leh laam ahih lam ih zaksa thute tung tawnin ih mu thei hi. Tua ahih man in pilna thupi sakin, ih han ciam zawh zahzah in innpan ahi zongin han ciam in naupangte mailam nuntak zia ding gelkholh sak in a han ciam dingin ih ki han thawn hi.
Ka Lungdam

Add new comment

9 + 6 =