Tonu ih muhdah leh bang phattuamna om ding hiam?

Tonu muhdah kawmin Tapa Jesu tungah itna lian ki lak zo lo cih thu a phawk kha lo mi om hi.
Topa Jesu lungtang leh Mawhcilna neilo Tonu Maria ii lungtang pen ki khen khia theilo hi.
“Na Nu na Pa zahtak in” cih thukham om mah bangin Tapa Jesu ii Nu tungah zahtakna piakna in bang khialhna om ding hiam? Zahtakna (Honour) leh Biakna (Worship) pen kician takin ih tel ding kisam hi.
Topa Jesu ii nungzuipi te vekpi phial a tai mang uh hangin singlamteh phungah kip takin a ompih Tonu Maria pen langpang in mudah le’ng bang phattuamna ngah ding.
“Nu…na ta en in” ci-in Tapa Jesu mahmah in mihingte a-ap Tonu Maria pen langpang in muhdahna tawh ken bang phat tuamna ngah ding ka hi hiam?
Canaan mopawi ah Tapa Jesu ii amasa pen na lamdang lahna hong muhsak banah nungzuipi te a um sak Tonu Maria pen langpang in muhdahna tawh ken bang phat tuamna ngah ding ka hi hiam?
A zenzen in Tonu Maria pen zahpih bawlin a langpang mite tawh na ki tuah khak leh amaute mudah kei-in. Amaute ading thunget sak in.
Mi khat peuh peuh in na pianna na Nu a muhdah ding na phal loh mah bangin Pasian’ Nu Maria zong mite muhdah ding phal kei-in.
Leitung ii honpa Messiah hong suak khia sak, Jesu Topa ii Nu Maria pen langpang in, muhdahna tawh bang phat tuam na ki ngah hiam cih hong gen dih un.