Catholic Nisim Lungdamna Laisiangtho. Hun Nautaang Nipi Kaal (26) na. 2.10.2024 (Wed)

Luke 10:1-12

1. Tua khit ciangin Topa in adang sawmsagih le nihte seh a, a paina ding khuapi, khuaneu khempeuh ama mai-ah nihta, nihta-in a sawl hi.

2. Amah in amaute’ kiangah, “Buh at ding tampi a om hi. Ahi zongin a atmi a tawm hi. Tua ahih manin lo lai-ah buh at nasemte hong sawlna dingin lo nei Topa’ kiangah thu na ngen un.

3. Pai un. Ngia hon laka tuunote bangin note kong sawl hi.

4. Sum bawm ahi a, thung-ip ahi a, khedap ahi zongin, na keng kei un. Lampi ah zong kuamah na hopih kei un.

5. Inn khatpeuh ah na lut uh ciangin, ‘Hih inn sungah nopna om ta hen,’ ci-in hopih masa un.

6. Tua inn sungah nopna a deih mi a om leh, note’ piak nopna a tungah a tung ding hi. Ahi zongin a om kei leh, note’ kiangah hong kilehkik ding hi.

7. Tua inn ah na taam sungun nek ding dawn dinga hong piak peuhpeuh na ne un, bang hang hiam cih leh, nasemte in thaman ngah ding a kilawm ahi hi. Na zin tunna inn uh khel kawikawi kei un.

8. Khua khatpeuh ah na lut uh ciangin, note hong san uh leh na mai uh-a hong lui peuhpeuh ne un.

9. Tua khua-a cinate damsak unla, amaute’ kiangah, ‘Note’ kiangah Pasian’ gam hong nai ta hi,’ ci-in thu na hilh un.

10. Ahi zongin khua khatpeuh ah na lut uh ciangin, khua mite in no hong nolh leh, tua khua kongzingte ah na paikhia unla,

11. ‘Ka khepek uh-a baang na khua uh-a leivuite nangawn no lang a pang dingin ka singkhia uh hi. Ahi zongin Pasian’ gam hong nai ta hi, cih na thei ta un,’ ci-in na gen un.

12. Ken kong genin ah, tua ni ciangin tua khua in Sodom khuapi sangin a thuakzaw ding hi.

Hih in Topa lungdamna lasiangtho ahi hi.

Chirstu Topa aw natung ah phat na om tahen.