Thungetna om kei leh

“Thungetna om kei leh vantunggam ki tung zo lo hi.”

Hotkhiatna ngah nading in thungetna thupi mahmah hi. Thu na nget kei leh na kha in hotkhiatna ngah lo ding hi.

“Na lung a lut kei leh thungen dah in, lauhuaina atuak lah hi sam lo, thu nget ding ki sam kei” cih pen lungsim hoih lohna tawh kampauna ahi hi. Thungetna om kei leh vantunggam ah nang adingin lauhuaina om ding hi. Tuisawppa John hun a kipan tu hun dongin, vantunggam in zawhthawh bawlna thuak a, mi ngongtatte in thatanghat thu tawh a luahsawm uh hi.” (Mt 11: 12). Tua ahih manin thu nget nadingin nang leh nang tha na kipiak kul a, na ki sawl kul hi.

Thungetna a thanem mite in lungsim leh pumpi tha nem in thu nget ding haksa sa uh hi. Nang leh nang ki zawh sawm inla, na lungsim, na pumpi tawh thu na nget zawh na dingin hanciam in. Ki hanthawn den in. Tua hi leh na thunget ding hong baih tuam ding hi.

Kha nuntakna leh pumpi nuntakna in ki langpang in ki lem lo uh hi. Tua ahih manin khat vei vei ciang, na pumpi a nuam hangin na kha in lungnopna nei lo-in om thei hi. Na pumpi in hong khem thei hi. Thu na nget man loh na dingin paulah tuam tuam hong pia ding hi. Tua ahih manin thu nget na dingin nang leh nang, ei leh ei tha ih ki piak, ih hanciam ding kisam hi.

Nisim nuntak kalsuanna ah a pat, a lai, a tawpna te thungetna tawh kalsuan in. Na pumpi in na kha ii nasem/sila ahih dongin thu ngen in. Thunget ciang bekin na kha hong cidam in na pumpi hong hat ding hi. Thu na nget kei leh na pumpi tha hong kiamin na kha in zong hotkhiatna ngah lo ding hi.