Tate suksiatna apiangsak thei it luatna nam (5)

It luat manin suksiatna a piangsak thei val luatna nam (5)
Ta te midangte Sangin ahoihzaw, asangzaw in koih zo ci-in a ki pak te….
Tate a sukha peuhmah, sia/siama te nangawn dongah a thuaklah te, ta te a gumlua te….
Tate khut mul, khe mul them zo pelem sak lo-in koih zawhna hangin a lungkim te….
Tate aktui dop in ka dop hi ci-in a ki tangko ko te…
Tate a it hilo in, a susia ka hi hiam cih nu leh pa te ih kisit tel theih nangin anuai a te en ni.
Bang teng hih kha khin ka hi hiam cih ki sit tel ni.
1. Deihsak luatna
Innkuan kimkhat te in a ta te pawlkhat pen deihsak pha diak thei hi. Nek thei khat peuhpeuh ah hih ka tapa nek ding, hih ka tanu bek ading cih bangin a dangte’ nek ngamloh dingin ci thei hi.
Pi leh Pu, Nu leh Pa te suahni pawi bawl loh hang phamawh kei, hih ka tu masa pen ading ahih nak leh cake ahih leh alian pen, letsong zong ahoih pen pia ding cih bangin thupi bawl sak diakna a ngah tu leh ta te in amau angsung ding bek thupisakna hong khang ding hi.
Midangte ading ngaihsut sak thei nawnlo, awlmawh nawnlo in kei ading cih bek hong ngaihsun ding hi.
2. Dal/ gup luatna
Tanu tapa in khat peuh peuh khial kha in a Pa in thu hilh in tai ding kipan leh a Nu in na panpih pah. A Nu in thu hilh in tai ding hi leh a pi apu in na dal pah cih te hi.
“Naupang hi ven, aman bang thein ai ding, a liat ciang thumang mah in teh” cih bangin makaihna tawh a khangto nuapang in a liat ciangin zong koi ci bangin hong lem ding hiam? A neu tung pankipan a khial leh aman khen thei lo, a Pa in khial hi ci leh a Nu in na dal, a Nu in khial hi ci leh a pi in na dal cih bang tawh a khangkhia naupang adingin ama hih peuh peuh a man suak hi.
Naupang te hi ci bangin khansuak leng a liat ciangin zong mawhna khialhna lian pi te a bawl ding baih sak mahmah thei ding hi. Ki dop huai hi.
3. Ki kep val luatna
Innkuan bupin amah tawh buai. Naupang in na khat peuhpeuh hong hih thei ei ci leh a innkuan bupin pahtawi damdam. Khut bet. Naupang in tui cih leh tui, an acih leh an amai ah tungpah. Anek a dawn khit ciang a sengsak pah ding mi om, bang silh nuam cih a gen khit phetin akiang tung pah.
Naupang in khut leh khe a neilo mahmah tawh ki bang hi. Tan (10) bang tung ta in an ki bak lai cih bang mi zong om thei hi. Hi bang naupangte in amau leh amau ki thupi sak uh hi. Mun dang, mite lakah a tun ciangin bang mah hih theih nei lo uh hi. Pil na sinna ah a zawh mahmah uh hangin sep theih, bawl theih khat zong aneilo mi suak thei hi.
4. Ama deihna zui lua
Naupang in tua deih ing cih leh leisak pah. Mite lakah amai mial loh nading ci-in moh lei nang tam pipi pia. Naupang in zong ama deih peuh peuh a ngah thei khin ahih manin na khat peuh peuh a ngah masiah ki tom thei pah, kap pah, lei ah kibual pah, nu leh pa ten zong ama deih leisak pah.
Hi bang naupang in thupi sak nei nawnlo hi. Van zong hoihtak kem thei lo, seng thei lo, paai gawp. Mangngilh baihin na khat peuh mansuah leh zong a ki leikik theih thei ahih manin phamawhsak nei se nawnlo. Sum zat ki dawm thei nawnlo in pheng zat thei hi.
Hi bang dan naupangte in thupi sak bang mah nei lo, awlmawh nei nawnlo in nopsakna zong nei lo uh hi. Deih bang bang ngah ahih manin hanciam nopna lungsim zong nei nawnlo hi. Nasep ding, gim ding pen thuak lah uh in n ate thupitna thei lo uh hi. A kum uh hong tam in a pumpi hong khangto mahtaleh hih theih, sep theih a nei lo mi hong suak ding hi. Cihtakna tawh nasem mi suak zo lo ding hi.
5. It luatna
Naupang cihte pen kimawl, kimawlna pen liamkha cih in ngeina hi. Naupang a kimawl mawl kawmin lam gei a singkung phulkha ahihmanin tua singkung aphuk nuam nu leh pa om thei hi. Naupang te in a kimawl kawmin tuk thei hi. Na khat peuhpeuh phul kha thei hi. Nu leh Pa te in naupang amah leh amah tho to sak kikna in lam man hi.
Tua bang hilo in naupang tawm khat tuuk leh phong pah, na khat peuh peuh tawh ki nawk kha leh a gei a om te tungah mawhna zong pah, tua dan a aki pantah naupangte in a liat ciangin bang mah sem ngamlo, tavuan khat peuh zong len ngamlo uh hi. Hi bang dan innkuan sung pan akhangkhia naupang a tamzaw in cihtakna nei lo-in, amau lungsim anawngkaaisak n ate them zong thuak zo lo hi.
Naupang a liat ciangin pilna zon na ah hitaleh, nasepna ah hitaleh, zi/pasal neihna ah hitaleh haksatna tawm thuak leh tho zo nawnlo, ding no nawnlo uh hi. Gentheihna tawmno khat a tuak pen alianpi suaksakin mainawt ngamlo uh hi.
Mihing ih cihin leitungah aom nuntakna nei ih hih mah bangin naupang te amau kum tawh kizui in ih khangtoh sakna in lampi man ahi hi.
Naupangte kahna in cidam na dingin hoih hi. A sawtpi ahih kei nakleh hun khat ciang kap sak lel in. Tu amah bangin naupang pai a kisin hun in paisak in. Lam pai kisin kawmin a tuuk leh zong tuuk sak lel in. Lampai sin na dingin a kizuak vante zat loh ding hoih zaw hi.