Ta te vai puak

“Na Nu leh na Pa zahtak in.” (Pai 20: 12)

Ta te aw Nu leh Pa te zahtak un. Hih in kamciamna tawh thupiak masa ahi hi. (Eph 6: 1-3)

Nu leh Pa te in ta te adingin Pasian mahmah ii hong piak a hoihpen thupha hi.

Nu leh Pa te thupi bawl un.

Hi leitung ii Pasian khat ahi uh hi. (Gen 12:3)

###

Hi Laisiangtho kammal in thupha tawh ki bang kammal hi.

Nu leh Pa te thu hilhna te zui in.

Nu leh Pa te in ta te adingin Pasian’ palai, Pasian tang mi te ahi uh hi. (Pau 13: 24)

Nu leh Pa te ii hong thu hilh na te khempeuh, na lungtang sungah gelh in. (Pil 7: 1-27)

Bang hang hiam cih leh Nu leh Pa te in ta te adingin Pasian tang mi te ahi uh hi.

Nu leh Pa hong thu hilhna te thupi sak unla kem cing un.

Bang hang hiam cih leh Nu leh Pa te in ta te adingin a masa pen sia/siama te ahi hi. (Pau 22: 6)

Nu leh Pa hong gen thu te zui-in nungta in. (Pau 6: 21)

Bang hang hiam cih leh ta te in Nu leh Pa te ii lungtang te hi.

Nu leh Pa thu mang in.

Nu leh Pa te thu mang na in pilna hong khang sakin Pasian mai leh mi te mai ah maipha hong ngah sak hi. (Lk 2: 51, 52)

### 

Nu leh Pa te in ta te, mi tawh ki pawlna, ki zopna te ah amasa pen hong hilh te ahi hi.

Tua a hih manin Mt 15: 4 sungah “Na Nu na Pa zahtak in. Hi in Pasian thu kham ahi hi” ci hi.

Tua ahih manin ta te in Joseph leh Maria te’ kepna nuai ah a om naupang Jesus etteh in Nu leh Pa te tungah bawl ding vaipuak te hoih takin sep ding ahi hi.

July (26) ni, Nu leh Pa te pawi ni cih in a nungta lai Nu leh Pa te hitaleh hong nusia sa Nu leh Pa te hitaleh amaute’ tungah lungdam koh ding ni thupi khat ahi hi. Tua banah Nu leh Pa zahtak in cih thukham pen teci panna ni zong ahi hi.

Nu leh Pa te zahtak lo-in zahpih bawlna in mawhna lian hi ci-in Laisiangtho in gen hi. (Mt 15: 4)

Ta te aw, Pasian deihna thu in Nu leh na Pa zahtak ding ahi hi.

Nu leh Pa thu manglohna hang apiang siatna te

Nu leh Pa te a simmawh bawl mi in samsiatna thuak ding hi. (Thu 27: 16)

Nu leh Pa te a samsiat mi in khuamial sunga meivak kisumit bang ding hi. (Pau 20: 20)

Ka ta aw, na Pa hong thupiakte zui inla, na Nu hong thu hilhna te mangngilh kei-in. (Pau 6: 20)

Mihai khat in a Pa thu hilhna te thudon lo hi. (Pau 15:5)

Nu leh Pa te a samsiat mi in thahna thuak takpi ding hi. (Lev 20:9)

Pasian thukham in na Nu leh na Pa zahtak in. Mi khat peuhin a Nu leh a Pa tungah kam tawh mawh hi. Tua mi si taktak ding hi ci hi. (Mt 15: 4)

Na nu leh na pa zahtak in. Nang leh nang na ki-it bangin na veng te zong it in. (Mt 19: 19)

Na nu leh na pa zahtak in. Hi in kamciamna tawh thupiak masa ahi hi. (Eph 6:2)

Nu leh pa te a samsiat mi peuhmah in thahna thuak ding hi. (Pai 21: 17)

Na lungsim khempeuh tawh Topa muang inla, ama tungah ki-ap in. (Pau 3: 5)

### 

“Nu leh Pa te zahtakna in khan hong sau sakin ih tun na peuh ah hong mapai sak hi.” (Deut 5: 16)

Nu leh Pa thupha te phawkin Nu leh Pa te lungnopna a pia zo ta te ahi zo dingin Topa’n thupha hong pia kim ciat ta hen.