Nupa kal sunga thusim te

Nupa, zi nei/pasal nei mi khempeuh in thanemna nei ciat uh hi. Pasian khat bekin thanemna neilo hi. Tua ahih manin na zi/pasal ii thanemna bek na et leh ama hoihna phatna te na mu ngei kei ding hi.
Mi khempeuh in a beisa hun a mawhna nei ciat hi. Mihing in vantungmi hi lo hi. Zi/pasal neih ciangin (ahihkeileh) kiten ciangin na tenpih ding nu/pa ii abeisa hunte satsuah nawn kei-in. A thupi penin na tenpih nu/pa ii tu laitak a nuntakna hi. A beisa hun ahih leh ki kheng khin hi. Maisak inla mangngilh in. Tu a na nuntakna uh leh na mailam kalsuan na ding uh bek ngaihsun zaw in.
Ki teenna khempeuh in haksatna om hi. Ki teenna in nuamtak a kalsuan na lampi hilo hi. Innkuan hoih/nuam khempeuh in gentheih haksatna te palsat ngei ciat uh hi. Gentheih haksatna te thuak hun ah itna man te teci ki lak zo hi. Na innkuan ading in mainawt in. A kisap hunte ah na innkuanpih nu/pa tawh na omkhop theih na dingin na lungsim puahpha in. A hoihlo pen te ahoih pen in na kikhel sak zawh na dingin na kiciamna te phawkin. Dam taleh na taleh amah tawh om khawm in.
Innkuan khempeuh ah gualzawhna tuam tuam om hi. Na innkuanpih, na innkuan sung thu pen midangte innkuan tawh cik mah hunin teh kei-in. Ki bang ngeilo ding hi. Pawl khat te nang sang senpyi zaw ding, pawl khat te nang sang haksa zaw ding hi. Innkuan sung lunggimna te na pelh zawh na dingin lungduai takin nasep hanciam in. A sawt ciangin nang’ deih bang in na innkuan sungah hong ki cing ding hi.
Ki teenna in gal pulakna hi. Zi/Pasal nei ding na kipat leh tua ki teenna ii gal te a do dingin apulaak na hi hi. Innkuan/ ki teenna ii gal pawl khat te in—
Ki theihmawh bawlna, thunget lohna, ki maisak lohna, midangte hong buaina, ciilna, ki-itna omlohna, lungkhauhna, thadahna, kizahtak lohna, zuau khemna te hi. Na innkuan sung nakep zawh na ding leh hih gal te na do zawh na dingin ki gingkhol sa in om in.
A kicing innkuan cih omlo hi. Ki ging sitset sa aom ki teenna cih zong omlo hi. Ki teenna in a haksa nasep khat hi. Tua tungah nisim na sep zawh na dingin nang leh nang hehpihna nasem khat bangin kingeihsun in sem in. Ki teenna cihin mawtaw khat tawh ki bang hi. A kip den/ a to na dingin Mawtaw bawlna ah puak zel kul hi. A zenzen in tua mawtaw pen mawtaw bawlna ah puak kei leteh hun khat ciangin mawtaw kisia thei ding hi. Ahih kei leh zong mawtaw nei pa buaina hong pia thei ding, damlohna khat peuh peuh hong pia thei ding hi. Ki teenna tawh ki sai-in awlmawh lo-in om kha kei-in.
Pasian in nang’ deih, a picing mi hong pia lo ding hi. Nang’ deih dan mi hong hih na dingin na pattah na ding puahtheih ding danin mi hong pia hi. Tua pen lungduaina, thungetna leh itna te bek tawh ki ngah zo hi.
Ki teenna in lauhuaina lian khat sanna hi. Mai lamah bang ci ding cih ki gen thei lo hi. Hun leh ni te ki khel thei ahih mah bangin ki kup ding hun/ mun pia in. Pasal in ama nasep hoih tanlawh thei, ahih kei leh ta nei zo lo zong hi thei hi. Tua bang te thuak zawh/ san zawh na dingin Pasian kiangah thunget ding thupi hi. Hi kei leh Innkuan ki khen thei hi.
Ki teenna in laidal tungah letmat thuh bek hilo hi. Hih in a tawntung ading hi. Na khempeuh piakkhiat ding hi. Itna in mi nih te a kigawmsak kaw tawh ki bang hi. Nupa ki khenna in lungsim sung pan akipan ahi hi. Dawi mangpa in na lungsim ii an hi. Nupa kikhen ding cih thu cik mah hunin ngaihsun kei-in. Na innkuanpih nu/pa tungah cik mah hunin hong kikhen sak thei kammal, gamtat te genkha pau kha kei-in. Na ki teenna uh a kip nading teel in. Pasian in nupa ki khen pen muhdah mahmah hi.
Innkuan khempeuh ah ki piakkhiatna kisam hi. Innkuan in bank account tawh ki bangin tampi piak kul hi. Na bank card sunga na khol sum te na thoh kik theih dingin na ap sum te ahi hi. Na innkuan sungah itna, kilemna leh ki thudonna te na ap kei leh innkuan nuam na ngah ngeikei ding hi. Tua ahih manin tu ni pankipan innkuan ading thungen in.
Topa min tawh nupa/ innkuan ki sia sak kei-in.