Nu leh Pa te tavuan leh vaipuak

Nu leh Pa te in tu leh ta te ii a masa pen sia te ahi uh hi. (Pau 22: 6)

Nu leh Pa te aw, na ta te uh adingin a ettehhuai lamlak te na hi un.

“A innkuan sung hoih takin uk zo-a, na khempeuh ah a tate in a thu mangin a zahtak mi hi ding hi. Nu leh Pa te in tu leh tate pen thuman thutak tawh pilna gamh a piak ding banah, vantung gam lampi zong a lak ding uh hi. (1 Tim 3: 4) Bang hang hiam cih leh ta te in Nu leh Pa te adingin Pasian piak a lian pen letsong hi.” (Ps 123: 3)

Nu leh Pa te ii tavuan leh vaipuakin lungsim siangtho, kisuanna om het lo leh thuman upna taktak pan a hong piang ki-itna ding deihna tawh ta te kep ding, makaih ding ahi hi. (1 Tim 1: 5) Ta te in gamlak aom paak te bang hi a, amaute pen thuman thutak te pia in a tawntung in thu hilh ding ahi hi. Bang hang hiam cih leh tanu tapa te in nu leh pa te adingin Pasian hong piak “gamh” te ahi uh hi. (Ps 127: 3)

Ta te thuhilhna ii thaman in a sih dongin lam khialh na tawh ki pelh ding hi. (Pau 22:6) Hun la-in ta te thu hilh ding ahi hi. Thu hilhna, lam lahna om lo-in mihoih ki suak lo hi.

Thu hilhna ah a thanem nu leh pa cih te in ta te a it lo te ahi uh hi. (Pau 13: 24) Thu na hilh ciangin ki neihkhemna om sak kei-in. Khaici hoih te hong po khia ding hi. (Rome 12:9)    

Lametna om ahih manin na ta te thu hilh in. (Pau 19: 18) Thu hilhna a ngah te in mi dangte zahtak uh hi. Tua banah a mah leh amah a ki muang nuapangte nungsangah a thupi nu leh pa te ki mu ding hi.

Nu leh Pa te in ta te tawh kikhatin om ding hi. (Col 3: 21) “Sagih vei a tuuk zongin tho kik ding hi. (Pil 24: 16)

Naupangte itna a sin sak zo pen te in nu leh pa te ahihna thu phawkin kem un. (Jn 14: 15) “Na sep na khempeuh ah na ma pai ding hi.” (Pil 14: 23)

Tate in Pasian hong piak letsong/thupha ahi hi. (Ps 127: 3) Gamtat hoih ding hanciam in. Gamtat hoih nading hilhna in a mailam ading a kip khuampi phuhsakna ahi hi.

Nang thupha hong pia te, thupha ka pia ding hi. Nang tungtawnin minam khempeuh in thupha a ngah ding uh hi. (Gen 12: 3)

####

Nitak na lup ma-in na tu na ta te thupha pia in. Amaute tungtawnin minam khempeuhin thupha a ngah ding uh hi, Topa in ci hi.

Tate adingin thunget sak ding thu te

Na tate in Pasian tawh a ki zop theih nadingin thu ngetsak in. Pasian tawh ki zopna in a picing nuntakna ngahna hi. Pasian tawh ki zopna sangin a lian zaw ki zopna hi leitungah omlo hi.

Na ta te un Pasian a zahtak nading in thungetsak un. “Ei te in na khempeuh apiangsak vanglian Pasian a up na dingun ih ta te ih hilh ding hi.”

“Zahtakna leh upna ah thu ngetsakna in na khempeuh te sangin thupi zaw hi.”

Pasian a zahtak naupang te in amaute a piangsak Pasian nasepna sungah ki hel ding thalawp zaw uh hi.

Eite in ta te tawh ih ki ho dan mah bangin Pasian tawh thungetna hangin ih ki zom ding hi. A nunung ciangin tua in na ta te Pasian tawh a ki zop nading lamlak khat hong suak ding hi.

###

Ta te in Nu leh Pa te adingin hih leitungah bek tham lo, vantunggam nuampi dongah Pasian piak a manpha mahmah gamh hi.

###

Tua ahih manin July 26 ni, Nu leh Pa te pawini in a lamdang deuhin ta te thupha piak ding, ni thupi khat ahi hi.

Hi ni-in Pasian hong piak ni hi a, Nu leh Pa te khempeuh cidam, lung nuam in ta te khempeuh tungah Misiangtho Joachim leh Anna te thupha hong tung ta hen.