Mawhsutna ii manphatna

Mawhsutna pan akingah thupha nam tampite sungpan nam (15)

1 - Mawhsutna in ih mawhnate hangin lungnoplohna/dahna lah nading hi.

2 - Mawhsutna in Pasian hehpihna thupha ih kisapna thu lahna hi.

3 - Mawhsutna in ih lungsim tawng tha hong hatsakin ih lung hong vaaksak hi.

4 - Mawhsutna in siangthona ii hoihna hong khang sak hi.

5 - Mawhsutna in ih lungsim leh ih kha hong nuamsak hi.

6 - Mawhsutna in kiphatsakna, ki liatsakna lungsimte hong hepkhiat sak hi.

7 - Mawhsutna in Pasian thu piakna tawh ki zui-in mawh maisakna ih ngahna hi. Pasian kiang pan mawh maisakna pen ki sikkikna tawh mawh ih sut hunin ih ngah hi.

8 - Mawhsutna in hell meikuangpi tun nading mawhna pan hong honkhia hi. Itna leh mawh maisakna in Pasian kiang pan hong pai hi.

9 - Mawhsutna in ih mawhna neu te zong hong kiam sak hi. Mawh ih sut khit ciang, mawh maina ih ngahsa mawhna te ih bawl kik loh nading in hong panpih hi.

10 - Mawhsutna in mawhna te Topa Jesu ii sisan tawh sawpsiangna hi. Topa Jesu ii si tawh singlamteh tunga hotkhiatna tawh thawhkikna ah ki hel na hi.

11 - Mawhsutna in mawhna hanga ih suplawhsa thupha hong ngah kik sak hi. Tui sawpna ih ngah lai a, ih ngah thupha te mawhna ih bawlna hangin ih suplawh aa, mawhsut in, ki sikkikna tawh ih kikhel na hangin thu thuphate ki ngah kik hi.

12 - Mawhsutna in sihna leh thukhenna dingin ih kha hong ki gingkhol sak hi. Lau na omlo in sihna ki mainawt ngam hi.

13 - Mawhsutna in upna, lametna leh itna te om hi cih lahna hi. Mawh ih sut laitak a ih ngah ih lung nopna pan tua thupha hong khang sak hi.

14 - Mawhsutna in eite nuntakna sungah singlamteh ciaptehna khat hong hi sak hi.

15 - Mawhsutna in a kicing suahtakna hong ngahsak hi. Ahi zongin lam khat ah zong mawh maisakna ih ngah na phawkin ki sikkikna takpi tawh ki khelna bawl ding kisam hi.

Kumthak hong tun simin Christian te in a sep zawh semsem in kum lui adingin Pasian tungah lungdam ko kawmin kumthak ah thupha te tawh ih om zawh nang mawhsut in ih lungsim, pumpi thaksuah zawh nang ki gingkhol thei hi. Kum thak ah nuntakna thak tawh ih kalsuan zawh nangin hun hoih ngah simin mawhsut ciatni.

Pope Francis gen mah bangin “mawhsut ding lau kei-in.” Topa Jesu kiang pan mawh maisakna sang in.

Topa Jesu in hong ngak den hi.