Lawban mei halna

Lawban tawh kisai in (Rev 8: 3-4) sungah “Kham tawh a kibawl lawban halna kuang a tawi, vantung mi dang khat hong pai-in biakna tau’ mai-ah a ding hi. Mi siangthote in thungetna-in a zat ding uh le kumpi tokhom’ mai-a om kham tawh kibawl biakna tau tungah biakpiakna-a kizang dingin lawban halnamtui tampitak amah kipia hi. Mi siangthote’ thungetnate, vantung mi’ khut-a lawban khute tawh Pasian’ mai-ah a tungto hi” ci hi.
Lawban cihin thungetna ah a kizangh Pasian deih van khat ahi hi.
1. Lawban pen a nuai lam pan en leng, Lawban ii a beel/kuang ih mu masa ding hi.
2. Lawban khau ah sik kual neu 12 a om ih mu ding hi. Tua in nungzuipi 12 te lim lahna ahi hi.
3. Lauban khau khat tungah sik kual a lian thum ta a om ih mu ding hi. Tua te in Pa, Tapa, Kha Siangtho te lim lahna hi.
4. Tua ciangin sik khau kaih suk kaih toh theih nading in sik kual khat ih mu ding hi. Tua in eite hong hon, Topa Jesu ii leitung ah hong kumsukna lahna hi.
5. A tung penpen a sikkual in Pasian pen Pawlpi’ lutang ahihna hong lahna hi.
6. Sikkual vekpi li om aa, tua te in Matthew, Mark, Luke, John te ahi, Lungdamna Lai Siangtho gelh mi (4) te lim lahna hi.
Lawban mei halna pan a khu te in eite’ thungetna te tawh a ki bangin vantungmi in Pasian kiangah hong ap sak hi. Tua a hih manin Lawban halna in nakpi takin thupi in khiatna nei hi. Thupi sak ni.