Kammalte’ vang/ Kammal thupitna

“Na gen kammal te in na om na inn hong suak hi.”
Tuni, nangin koi bang dan inn na lam hiam? Na inn in nang ii pumpi, nang ii kha te ahi hi. Nang ngaihsut thu te bangin na nuntakna sungah hong piang thei hi. Na genkhiat kammalte in na bil hong thawn kik hi. Nang ii gamtatna te in zong lam khat tawh nang kiangah hong tung kik hi.
Kammal te in vang nei mahmah uh hi. Liamma te a dam sak zawh mah bangin lungsim ngaihsutna zong hong khansuah sak zo hi. Natna hong piak theih mah bangin lungkiatna, supna te zong hong pia zo in hong puk sak zo hi.
Misiangtho Francis de Sale in kampau ciangin thuman ding, nunnem ding, mite simmawhna kammalte pau loh ding leh lungsim takpi tawh kam pau ding hong hilh hi.
Mipi mai ah ahi zongin mi khat peuh peuh tawh ahi zongin ki ho ciang, kam pau ciangin lungsim takpi tawh pau ding/ gen ding kisam hi.
Ih khialhna te hong ki genkik ciangin ih sansiam ding haksa mahtaleh nunnemna cih khuaizu tawh ih hel ciangin baih takin hong sangsiam sak zo hi. Kampauna, laigelhna te ah na zat kammalte in midangte hehna ding, thangpaih nading kammal te ki hel sak kei in.
Pasian kiangah ngaihsut siamna thupha ngen in. Ngaihsut siamna in bang hun ah pau ding, koi ci pau ding cih theihna ahih banah bang hun, koi munah dai ding hiam cih theihna zong ahi hi.
Na gen kammal te in na om na ding inn hong suak hi. Na gen, na pau khiat kammalte pilvang tak leh ciimtakin teel in.