Hun Nunung

Tonu pahtawina ahi “Ave Maria” thu ngetna na nget sialin nang ii hun nunung a ding thu a ngen khin na hi hi. “Tu a kipan ka sih hun dongun mawhnanei kote a dingin thu hong ngetsak tan.”

Sihna cihpen mi pawlkhat a dingin a lauhuai mahmah thu khat hi thei hi. Tua a hihmanin zong I hun nunung a ding kingaihsun nuam khol lo hi.

Ahi zongin sih hun, I nunung hun cih pen lawpna takpi tawh I ngak ding hun khat ahi hi. Tua bang a hih theih nading in Pasian tawh I kilem ding kisam hi.

Mawhsut den in na nuntakna sungah Pasian om hi cih, na phawk tawntung leh na hun nunung, nasih kuan ciangin natna satna bangzahta in na thuak zongin na kihehnem zo dinga, lungnopna na ngah ding hi.

Topa Pasian aw..sih ding launa tawh ka kipelh zawh nangin hong huh in. Hi leitungah ka nuntakna in tawntung nuntakna ngah na dingin kiginkholhna a hihna thu hong phawk sak den ta in. Topa aw.. na hehpihna kip muangin ka beel hi. Tonu aw..thu hong ngetsak in. Ka Topa Jesu aw..nang tungah upna leh muanna tawh kong beel hi. Amen.