Hoihlohna te koi pan hong pai

Hoihlohna te koi pan hong pai hiam?
“Hoih hi” ci-in Pasian in ama piansaksa te mu na pi’n (Gen 1: 31) bang hangin hoihlohna te leitung ah hong tung ahi hiam?
Pasian in hoihlohna te piangsaklo ahih leh bang hangin tua hoihlohnate hong tung ahi hiam? Pasian in na khempeuh hih thei ahihleh bang hangin hoihlohna te a omlo leitung piangsaklo ahi hiam?
Hi teng ngaihsun leng ki lungbuai kha thei ding hi. Ahi zongin amasa pen in i tel dingin hoihlohnate in Pasian piangsak hilo hi cih thu ahi hi. Hoihlohnate in hoihnate i kicinlohna hang hi. Khuavak ii kicinlohna ah khuazing a om dan ahi hi.
Hoihlohna cihin van hilo hi. Hoihlohnate’ tayakhan in mihing te hi. A taktak in mihingte in a hoih apha a dingin a kipiangsak mite hi aa, hoihlohnate mangpa ahi satan Lucifer nangawn hoihna phatna dingin a ki piangsak ahi hi. Ahi zongin a mahin Pasian lehdo in hoihlohna lampi zui ahih manin hoihlohna hong piang ahi hi.
Pasian in hoihlohnate tawh a ki pelh leitung piangsak zo himahtaleh leitung suahtaksak nopna lungsim tawh piangsak ding nangaihsun hi. Tua hikeileh mihingte in setzot bang hilel ding hi.
Catholic pawlpi’ Pasian thu sinna bu (CCC Page-311) sungah hong hilh cian hi.
Vantungmi te leh mihingte in ngaihsutna nei-in suakta takin a ki piangsak te ahih mah bangin amaute’ nunung ngimna ah suakta takin teel theihna leh itna te tawh kalsuan ding uh hi. Tua ahihmanin amaute in lam khial thei uh hi. Mawhna sungah zong kia khin zo uh hi.
Hi bangin leitungah akiteh zolo pumpi thuak natna sangin hong susia theizawh ahi mihing hihna tawh kisai hoihlohna te tampi hong piang hi. Pasian in tua hoihlohna te i phungpi hilo hi. Ahi zongin Pasian in tua hoihlohnate apiang nading khuan pia hi. Banghang hiam cih leh amah in ama piangsaksa te suahtakna pen thupi sak hi. Thuthuk takin hoihlohnate pan hoihna phatna te koi ci piang sak ding cih zong thei hi. Bang hang hiam cih leh vangliatna tawh a kidim Pasian in genzawhloh in hoih a, hoihlohnate pan hoihna te piangsak kik zo kei leh ama nasepna sunga hoihlohna te khempeuh om sak lo ding hi.
Tua hi leh banghangin Pasian in hoihlohna te do lo ahi hiam ci-in ki dong kik thei hi. “Topa hong huh lo ding maw, khat peuhpeuh hong hih sak lo ding maw ci-in i lunghiang ciangin Pasian in hong hih sak ding ee. Nang ka hong piangsak hi ven” ci-in hong dawngna i ngah kha tam.
Leitungah siatna tampi om hi. Ahi zongin eite in Pasian minam te i hi hi. Topa Jesu ii khut le khe te i hi hi. Ei lam pan i hih zawhzah in hanciam in siatna te hepkhiat zawhna i neih lam damin i phawk ding hi.
Siatna tawh kisai in Pawlpi in hong gencian na ah-
“Pasian in leitung leh tua tangthu i phungpi ahihna eite in kiptakin i um hi. Ahi zongin ama ngiimna lampi pen eite in i thei kei pahpah hi. I nunung hun ahi, eite ii a kicinglo theihna te a kisiat ciangin eite in Topa maitang i mucian ding hi. Vantung leh leitung piangsakna ngiimna ii anunung ni ciangin dai takin tawlngak nang Pasian in ama piansaksa te lamlakin a makaihna pen siatna leh mawhna te mah pan mihing te in tel zo pan ding hi. (CCC-314)
Pasian i um aa, i um kei zongin hoihlohna/ siatna cih pen om om ding hi. Ahi zongin Pasian upna in hoihlohna te tawh hong kipelhsak ding cih lametna ki nei zo hi.
Pasian i um aa, i um kei zongin hoihlohna/ siatna cih pen om om ding hi. Ahi zongin Pasian upna in hoihlohnate suksiat nading Pasian ii khut le khe te i hih nang hong phawk sak hi.
Pasian i um aa, i um kei zongin hoihlohna/ siatna cih pen om om ding hi. Ahi zongin Pasian upna in hoihlohnate sung mah pan hoihna phatna te hong piang ding hi cih lametna hong nosuah sak hi.
Pasian i um aa, i um kei zongin hoihlohna/ siatna cih pen om om ding hi. Ahi zongin Pasian upna in hoihlohna/ siatna hunah Pasian tungah upna tawh tua hoihlohna te lampelh sangin mainawt in paltanna in hoih zaw hi cih hong tel sak hi.