EPIPHANY (IH TOPA KILAHNA PAWI) & KUMTHAK INN THUPHA PIAKNA

+ Europe gam te in a inn kongpite uh ah 20+C+M+B+24 cih lai gelh uh hi.
Hih laimalte bang ni in gelh uh hiam cih leh Mipil (3) te pawini in gelh uh hi.
- A taktakin bel mipil (3) te pawi ci-a, lawh ding na hilo hi. Ei Kawlgam lam aa te'n Kawlgam lawh dan in laa a, eite'n mipil (3) te pawi ci-in ih lawh hangh tua in khiatna nei lo hi.
+ Bang hang hiam cih leh Manglai in (Epiphany) pawini ci hi.
- Hih (Epiphany) laimal pen mipil (3) in, a let (a translate) gam om vet lo ding hi.
+ Bang hang hiam cih leh a laimal khiatna/meaning mahmah pen mipil (3) te pawini a hih zenzen loh pi.
- Khat bel om hi. Tua ni-a kisim Laisiangtho mun ah mipil (3) te' thu kihel ahihna hang-a, mipil (3) te pawini a kici zong, hi kha mai thei hi.
+ Bang hang-a, hi bang-in kilet hiam cih ih theih cian loh hang-in, (Epiphany) cih pen mipil (3) te pawini a hih lohna bel kician mahmah hi.
- Kawllai in let lehangh, ပညာရှိမင်းသုံးပါးပွဲနေ့ na hilo-a, ဘုရားသခင် မိမိကိုယ်ကို မိမိဖော်ပြခြင်းပွဲနေ့ na ci hi.
+ Ei Zolai in Pasian' Kammal Kum A, Kum B a bu nih sung ah zong, Kawllai in a kiletna tawh a kibang ahi "Ih Topa' Kilahna Pawini" cih tawh na kilet hi.
- Nang ii na theih mipil (3) te pawini (A taktak in bel Ih Topa' Kilahna Pawini) in, Christmas hun hong khupsak (Christmas hun bei ta hi cih) ciaptehna limh ahi hi.
+ Latin America lam ah hih pawi pen Christu Topa Jesu pen Pasian' Tapa ahihna hong lak khia (hong mu khiasak) pawi a kibawl ahi hi. - Tua khit teh, hih pawini pen zanni in (January 6, 2024) ki bawl hi.
+ Ahih hang-in, hih pawini pen January kha (6) ni, Sani ni tawh hong kituak mawk ciang-in, thuzuite biakinn ah kikhawm a, a tam thei thei kihel kim a, pawi bawl zawh nading cih ngimna tawh Pawlpi in Nipini ah hong khiin tohsak hi.
- Topa Pasian amahmah hong kilahna pawini [mipil (3) te pawini] in gam lian/gol ahi America gam mun pawl khat te ban ah
Austria, Czech Republic, Slovakia, Germany, Hungary, Poland, Italy leh Sweden gam te ah hih laimal-te a inn kongpite ah a gelh uh na mu kha ding hi.
+ Hih pen January ni (6) ni-in gelh uh hi. Hih in mipil (3) te'n aksipi' makaih lamlahna tawh naungeek Jesu suahna bawng annekna kuang a omna mun a na tun na uh a phawk-kikna un a bawl uh gamtatna ahi hi.
- Tua mipil (3) te a min uh Manglai in
Caspar, Melchior leh Balthasar hi uha, tomlaakna in C,M,B ahi hi.
+ Tua hang-a, mi kimkhat in inn kongkhakpi tung aa kigelh C,M,B laimal te pen mipil (3) te' min, sa kha uh hi.
- A taktak in bel mipil (3) te' min na hilo a, hih C,M,B laimal mal (3) te' original ahih leh Latin lai pan hong pai ahi hi.
+ A sau (longform) in, "Christus Mansionem Benedicat" cihnopna ahi hi.
- Manglai in (May Christ bless this home)
cih nopna hi-a, ei Zolai in, "Christu in hih inn thupha hong pia (piaksak) ta hen! cihnopna ahi hi.
+ Hih biakna vai zuih suak ngeina pen Christu Topa in ama mite (nang le kei) hih kum thak ih Topa kilatna pawini pan kum bei dong hong ompih hi cih upna ahi hi.
- Tua hang-a, na inn kongkhak mai/tung ah na gelh ding a kilawm in bang hiam cih leh (20+C+M+B+24) ci-in gelh huai hi.
## Behlap hilhcianna:(20=tu kum 2024 mal li ii khen masak mal nih te 20
24=tu kum 2024 mal li ii khen nunung 24
## Ciapteh lai ding khat ah a kum mun ah na gelh kum na at ding manggilh kei in.
+ A kigelh ngeina bel inn kongpi ii a sung lam ah a kigelh hi-a, ahih hangh, pawl khat te in inn kongpi a pua-lam ah a gelh zong om hi.
- Na gelh ding ciang-in na zat ding chalk (မြေဖြူ) pen thupha piaksa chalk (မြေဖြူ) a hih kul hi.
Zolai in laisim thahat zaw te
Deih Sakna tawh Fr. Wilfred Suan
Crd to သျှားလွန်းမယ်
( 7 - 1 - 24)