Biakinn sungah zuih ding leh pelh ding

Biakinn sungah om zia ding

Biakinn ah kikhop ciangin amai pen ah tut theih nading in sin ding kisam hi. Anung lam ah tut nading vai zongzong kei-in. (Naungek tawh kithuah Nupi te lo buang)
Biakinn ah na kikhop ciangin vaidawn aom kei leh amai lamah mun lapah in. Vaidawn a om leh amau hong tut sakna mun ah tut ding hoihpen hi. Amai lam mun awng na ah tu lo-in a nunglam ah lawmte tawh tu in, Phone zatna, kihona te hih kei-in. Na Pasian zahtak in, aana thei in.
Biakinn sungah na tun ciangin tutphah tungah na khut zanin koih kei-in. Khe thuap sa in tu kei-in. Pasian inn sungah a om na hih man hi. Thuciamlui hun lai-in giahbuuk sungah koi ci om uh hiam cih ngaihsun kik in.
Biakinn sungah nupa te lo buang, nungak tangval tutkhop ding kilawmlo hi. Pasal om, zi om pi in zong a dang khat peuh tawh tukhawm kei-in. Mi tampi in hong en hi cih phawkin.
Biakinn na tun ciangin na phone silent (or) power off in koihin. Lamet lohpi in phone hong pai, messenger notification hong lut leh tua te in nang pen bang mah thei lo mi khat hi ci-in mite’ ciaptehna hong ngah sak ding hi.
Biakinn sungah, ki khop hun sungin phone sung pan Laisiangtho sim na sangin Laisiangtho bu pua in sim na hoih pen hi. Nang’ Laisiangtho a sim na hi phial zongin mi dangte muhna ah line a zang tawh hong ki bang sak ding hi.
Biakpiakna hun sungah ki ho na, Lungdamna Laisiangtho sim hun te ah lusukna te pelh in. Tua bang in lusu, ki ho in na om leh biakinn a kah lo, a kikhawm lo te mah tawh na kibang ding hi.
Ki khopna in naukepna mun hilo ahih manin naupang nei nu leh pa te in biakinn pai ma, inn pan in naupang te hoih tak thu hilhin kikhop ding kisam hi. Naupang adingin moh, dawn theih tuam tuam te pua kei in.
Biakinn sung lut ma-in hoih tak kigin kholh sitset ding kisam hi. Biakinn sung lut khit ciangin pusuak zel, lut zel na in mite nawngkaaisak in Pasian zahtak lohna tawh zong kibang hi.
Biakinn na pai ma-in na nek ding teng ne khol in. Biakinn tun khit ciangin thunget hun, Pasian thu ngaih hun te ah pusuak in na nekna in Pasian zahtak lohna, lau lohna lim ahih na leh a etlawm hetlo ahih lam thei in.
Biakinn pai baih zawh ding hanciam in. Na thawhbaih zawh kei leh alarm pia inla tho baih in. Ki khop ki pat hun, sumpi don hun te lap lohna in nang ii kiciat lohna leh picing lohna hong lak hi.
Biakinn sungah PK haina, biakinn sung biakinn pua te ah kham theih guih theih ahi, zatep, khaini, kunza, kunpong cih te zang peuhmah kei-in.
Ki khop man khit ciangin khat leh khat ki notset in ki pawlbawl un. Biakpiakna hun sung pan na thangahna te uh khat leh khat ki hawmin teci pang un.

Add new comment

2 + 18 =