Biakinn kahlei

Biakinn sung lut theih na dingin kahlei khat khit khat kahtohna pen khat veivei ciangin ki lungduai lo a hih manin ka Pi tawh Biakinn ka pai khawm ni khat ka Pi kiangah ka dong hi.

“Pi aw, bang hangin Biakinn pen lei tual tawh a kikim in ki lam lo ahi tam? A kikim in ki lam leh tawl liangin kahlei tungah kah kul nawnlo ding hi ven” ka ci hi.

Tua lai aa ka pi hong dawngna pen lunglut huai leh ciapteh huai mahmah hi. Ka Pi in “Pasian kiang ah baih tak in ki tung thei lo ee ka tu. Mihing te lam pan hanciamna zong ki sam hi. Kah lei khat ciatin mihingte’ huaihamna, angsung theihna, lungtomna leh amaute lungsim hoih lo te khat khit khat a zawh ciangin a sangna lam ah a kahtoh na ding uh theihsakna ahi hi. Kah lei pen khat khit ciang khat, a banban bekin ki kah to zo hi. Amasa pen pan a lai ateng kantan in a nunung pen ah a ki kah toh zawh loh dan ahi hi” hong ci hi.

Hi pen mihing te nuntakzia khat ahi hi. I lungsim ngaihsutna te khat khit khat i zawh ciang bek in Pasian om na mun ahi, a sang na mun i tung zo pan ding hi. I nuntakna sunga i hoihlohna te, i lungsim siatna kahlei te i zawh nangin i hun neih sung khempeuh ah hanciam ding kisam hi cih pen Biakinn sung lut dingin kahlei tungah i kah toh sialin i phawk ding ki sam hi.