Hehpihna leh mawhmaisakna in gal kidona leh gentheih haksatna te pan hong dal hi

Hehpihna leh mawhmaisakna in gal kidona leh gentheih haksatna te pan hong dal hi

A lianbel siampipa Pope Francis in nisim lungngaih ding, Lungdamna laisiangtho te sungpan hehpihna anei lo nasempa thugenteh na lungngai kawmin eite in midang te mawhna maisak ding leh it ding ih hanciam kei leh eite-in zong mawhmaisakna ih ngah kei ding a, it na zong ngah lo ding hi hang ci-in Sept. 13, 2020 ni Nipi ni sunhun Angelus thungetna pan gen hi.Mawhmaisak na leh hehpihna in eite nuntak kalsuan zia hi leh leitungin gentheih haksatna, natna tuamtuam te leh galkidonate tawh ki pelh ding hi ci-in gen hi. Pasian hehpihna lungsim eite in zong ih neih na ding, Christian te hong hanthawn hi.

Roma a om St. Peter tualpi ah a kikhawm thuzui te kiang a genna ah Pope Francis in (Mt 18:21-35) a om, hehpihna nei lo nasempa thugentehna lungngai in, Kumpi pa in tua nasempa leibat tampi te ama thumna hangin maisakna pia hi. A hi zongin tua nasempa in ama kiangah tawmkhat aba anasep pih pa maisak zo lo in thong kia sak hi. Kumpipa in tua thu a zak ciangin hehpihna neilo nasempa mawhna dan pia hi. “A zenzen in mawh maisak na leh hehpihna in eite aa dingin nisim nuntakna ah, gentheih haksatna leh natna tuamtuam, gal ki dona leh buaina cih tampi tawh ih ki pelh zo ding hi” ci-in gen hi.

Ki lemna in hehpihna tawh ki dim hi
Pope Francis in Pasian hehpihna lungsim alak kumpipa lungsim leh mihing te lungsim alak nasem pa lungsimte ngaihsun in, Pasian lungtangin hehpihna tawh akidim, athuman hi a, mihingte lungsim a hih leh dikna tawh thukhennate ki ciangtan hi. Topa Jesu in mawhmaisakna ii vangliatna sungah hangtakin ih ki hel nading hong hanthawn ahihna thu honggen cian in, “nakhempeuh in thuman na bek tawh ki khentat zo lo ahih na thu hong gen khia hi.” Hehpihna cih pen Peter in Topa Jesu kiangah ei tungah hong mawh mite bangzah vei maisak ding cih thu a dot ciangin Topa Jesu in a dawn kikna thu, Laisiangtho deih na in a tawntung in eite’n mawh ih maisak na dingin Jesu hong sapna thu Pope in hong gen hi.

Mihing te kim leh pam ah hehpihna
Pope Francis in a zenzen in mawhmaisakna leh hehpihna in eite’ nisim nuntakna hong tuam hi leh gentheih haksatna, natna tuamtuam leh gal ki dona te bangzah in ih pelh zo ding hiam cih thu lungngai hi. Hehpihna leh it na pen mihing te ki zopna ah koih ding kisam a, nu pa kal, Nu le Pa leh tate’ kikal, lawm leh gual kikal, ki zop na tuamtuam te kikal leh kumpi (gam) tawh kisai kizopna te kikal ah zong zatding a kisapna thu gen hi.

Pope Francis in ama lungsim a sukha, Sept.13 ni Nipi-ni Laisiangtho masa ahi, Sirach sunga, “Ni tawpni ding ngaihsun in, mawhnate paisan in.” A beisa a kitotna leh hehna in tho bangin hong nawngkaisak thei hi. Mawh maisakna in tawmvei sung aa ding bek hi lo-in, hong zui den ahi ki muhdahna leh hehna te nial in, a tawntungin na hoih ih sep suak ding ahih na thu, ahi zongin a beisa hun a ih hih mawhnate ki sitkikna in tua khelhna thu, a bei na dingin hong huh ding hi ci-in gen hi.

Vantung thungetna ih ngetna in mawh maisak nading hong zawn hi
(Mt 6:12) sung a Vantung thungetna ahi, Ko tungah hong mawh te ka maisak mah bangun ko mawh na te zong hong maisak in cih kammal in hong tel sak hi. Midangte mawhna maisak na ih lah zawh kei leh ei te in zong Pasian kiang pan mawhmai sak na ih ngen thei kei dinga, midangte mawh maisak nading leh it ding ih hanciam kei leh ei te in zong mawh maisakna leh it na ih ngah zo kei ding hi ci-in gen hi. A nunung pen in Pasian tungah lei bat bang zah nei ka hi hiam cih leh hoih na leh hehpihna te a dingin ih lungsim ih hon na ding, mi khempeuh amah leh amah Pasian Nu ahi Tonu Maria khut sungah a ki-ap nading hanthawn in a thugenna khup hi.

By Rev. Sr. Agnes Ciang Bawi

Photo taken from: Vatican Media