St. Theresa of the Child Jesus Pawini. (Oct 1, 2022)

St. Theresa Nungak siangtho te pawini

Tuni St. Theresa Sister te ii sang pawi Missa Biakpiakna pen Zingsang nai (6:30 AM) in kipan in tua sungah Missa Biakpiakna pen Kalay Zone Vicar Forane Rev. Fr. Joseph Kap Tung Nung in makaih in Pasian Kammal tawh Kha-an vakna pen Kalay Diocese Social Communication Director Rev. Fr. Joseph Thang Nen Zo Mung in hong nei hi. Missa Biakpiakna sungah Siampi (6), Nungak Siangtho te leh Nungngak Siangtho a suak ding sangnaupang vekpi gawm mi (100) kim kipha hi.

Pasian thu tawh kha-an vakna sungah Fr. Joseph Zo Mung in amasa pen in St. Theresa ii Nu le Pa te pen Pawlpi sungah a nupa un Misiangtho a suak masa pen te ahih na uh pan ki panin St. Theresa te Unau zong mi (9) a phak na lak ah (5) pen Nungak Siangtho suak in tua lo a dang (4) te pen a neu lai-in si uh hi cih thu leh St. Theresa ii a Nu zong St. Theresa kum (4) a phak laitak in si a hih manin ama ii nuntak na leitung thu in bangzah in hamsa ding hiam cih thu te hong gen hi.

Tua banah amah pen kum (15) a phak ciangin Camelite Sister khat suak a hihna thu leh Kum (24) a phak ciangin leitung hong nusia in a sih zawh kum (28) a cin ciangin Misiangtho suak hi cih ciaptehna a ngah nu hi-in Misiangtho a suah na pen “Do little things with great love” a cih mah bangin a sep peuh peuh neu ta leh thu lian hi ta leh itna bek tawh sem a hih manin Misiangtho a suak a hihna thu eite itteh theih dingin hong gen hi.

Anihna ah tuni aa lungdamna Laisiangtho tungtawnin a lian pen ahi nuamte in sila sem phot ding, naupang bangin om ding kiniam khiatna nei ding a cih mah bangin mawhna tawm a bawl pen pen te pen Pasian maiah mi hoih pen te mi lian pen te hi tua ahih manin mawhna ih neih loh na dingin haciam ni ci-in thu hilhna nei hi.

A thumna ah St. Theresa Nungak Siangtho Minpua St. Theresa Sister te ki pawlna a ki patkhiat zawh tu kum in kum (25) cing pan hi mah ta leh tu-in Nungak Siangtho a suak khinsa mi (161) bang pha in nasepna en leng Kawlgam sungah Diocese (5) sungah ah Community (42) om in Gamdang Philippine ah Community (1) om bek thamlo in Kalaymyo sungah zong Training Centre nei lai a hih manin hih pen Pasian piak thupha tak tak hi kei leh hun tomno sungin hi zahta in khangto lo ding hi. Tua ahih manin tuni diak diak in hi bangin thupha ahong pia Pa Pasian tung, hih kipawkna a hong ciang a hong kem St. Theresa tung leh hih kipawlna a phuankhia Archbishop Emeritus Nicholas Mang Thang tungah nakpitak in lungdamko ciat ni ci-in a hamphatna thu uh phawk kik sak hi.

Tua banah hi bangin a khantohna pen a pattah te siam ahihna hang bek thamlo in Nungak Siangtho a suak sa te zongin mite maiah a khua vak uh lak khia zo a hih manun naupang nungak no te in thangah in St. Theresa Sister sangah lutnopna lungsim a nei a hihna thu phawk sak kik in mailam ah zong hi bangin gamtat hoihna te azop suak zawh nadingun thapiak na nei hi.

Tua khitteh St. Theresa Nungak Siangtho te nasep bulpi pen Siangtho pumpi Biakna leh Siampite aa ding thungetsakna ahih manin Siampite aa ding thu nongngetsak uh lungdam hi mailamah zong noteng thunget na hat uh leh ih Diocese sunga om Siampi teng hong hoih sem sem in ih Diocese hong khangto mah mah ding a hih manin thungetna mah mah hong hanciam un ci-in lungdamkohna leh hanthohna nei hi.

A tawpna ah Misiangtho Theresa mah bangin ih sepna ih bawlna ciat ah Pasian itna leh midangte tungah itna tawh ih sep zawh ciat nang hanciam ni. Misiangtho Theresa aw, kote aa dingin thu hong ngetsak tan ci-in thu khupna nei hi.
Kikhop manciangin Nungak Siangtho te in a kikhawm teng an vak na nei uh hi. St. Theresa Sister te ii Innpi Mother House a cih uh pen tu laitak in a thak a lam san laitak hi-in dawl (3) ciang kahto zo ta hi. Hih a lim sunga pen tuni mah in a ki zaih hi-in innlam na ding tampi kisam lai ding hi. Huhna a pia nuam te in ki pia thei hi cih zong hong zasak ing. Lungdam.

Add new comment

5 + 2 =