Priestly Ordination of Three Jesuit Deacons at St.Mary's Cathedral, Kalaymyo.(Dec 3.2022)

Kalay Diocese hongcing hongkem Bishop Felix Lian Khen Thang khuttung pan
1. Rev. Fr. John Bosco Dim Khawl Thang (S.J)
2. Rev. Fr. P.V. Joseph Cin Hau Mang Buan Sing (S.J)
3. Rev. Fr. Simon Kam Sian Muan (S.J) te Siampi suahna Pawi, St. Mary's Cathedral, Kalamyo ah Siadaw (2), Siampi (55), Nungaksiangtho, Tangvalsiangtho te leh thuzuimi akigawm vekpi in (2500) val dingin ki um mawh hi.
Khua hun a hoih banah inntek Siampite Msgr. John Deng Cin Khup leh Rev. Fr. Francis Thang Za Sing te vaihawm siamna tawh setvante zong hoih in lasa te zong siam thei uh ahih manin tha kingah mah mah hi.
Missa Biakpiakna aman ciangin Jesuits kipawlna pan Myanmar Gam sunga om Jesuits teng a makaih Rev. Fr. Girish Santiago SJ.( Regional Superior of Jesuits, Myanmar) in Siadawte, Siampite leh mipite tungah hih Diocese sungah Siampi suahna pawi a bawl theihna uh hangin alungdamna thu hong pulaak khia hi.
Kikhop tuah ciangin mipite anvakna kinei-in annek tui dawn zong kicing mahmah hi.
An huan nasemte khatin tu kum pen zanni sun hun pek panin sagawh, sasem teng ki zo khin ahih manin an huan meh huan te aa dingin zong buaina omlo leh hunlap takin nasep ki zo siang hi ci-in kiginkholhna a tam manin nekledawn tawh kisai teng nuamtakin ki zo siang ahih na thu hong pulaak hi.
Inntek Siampipa in hih Siampi suah pawi buaina omlo in a ki zawh siang na ding thu kangetna sungah meiset ahoih nading lungngulhin zong thu ka ngen pha mahmah hi ci-in a thunget a ngah lungdamna thu pulaak khia hi.
Siampithak Fr. Joseph Mang in lungdamkohna thu a genna ah "Pasian thupha hang bek tawh hi bangin pawi a bawl thei ih hihi ci-in Pa Pasian tungah lungdam a koh khit teh Siadawte, Siampite leh Pawi sim mimal khat kim ciat tungah Siampi thak teng tangin lungdam kohna nei hi.
Sun-an nek khit ciangin Siampi thak te pahtawina zong noptakin ki bawl hi.
Jesuits kipawlna sung ah Myanmar Gambup ah Siampi a suak sa mi (11) om in tuni-in a suak thak (3) tawh gawm leng a vekpi-in Siampi (14) pha uh hi. A maute ii kipawi na (Society) sungah Myanmar gam sunga om vekpi Siampite leh Tangval Siangtho te akigawm (30) kim bek om pan uh hi.
Siampithak Fr. Joseph in lungdamkohna thu agenna sungah "tu-in Siampi suak khinta ka hih manun a beisa aa thu nong ngetsak uh sangin a tamzaw in thu hong ngetsak un" ci-in mipite ahong vaikhak mah bangin amaute aa ding mailam ah thu ngetsak semsem ni.