Priestly Ordination of Deacon Andrew Thang Muan Tuang & Deacon Francis Nang Deih Pau at St. Peter Church, Old Darkhai Village (26.11.2023)

Darkhai Parish a cing a kem Rev. Fr. Cyril Thang Dong Mang vaihawm siamna tawh His Excellency Bishop Felix Lian Khen Thang khuttung pan Deacon Thang Muan Tuang leh Deacon Nang Deih Pau te in Old Darkhai khua St. Peter Biakinn pi sung ah (26.11.2023) ni-in Siampi suahnaza ngah uh hi.
Nov. 25 (Saturday) ni-in St. Peter Biakinn Thak Honpawi leh Dalkhai Khua ah RCM Pawlpi a tun zawh kum (75) a cinna Diamond Jubilee Pawi noptak in a ki bawl khitteh Nov. 26 ni-in Siampi suah pawi a ki bawl ahi hi. Hih Siampi suah pawi ah zin hong tung thuah a hih manin zinvekpi (1300) kim leh Siadaw (1), Siampi a suak thak te nih tawh a kigawm Siampi (26) pha in nopci mah mah hi.
Sun hun nai (1:30 pm) panin Siampi thak te pahtawina zong noptak in ki bawl hi. Tua banah nitak simin lenkhopna zong noptak in ki bawl hi.
Hih pawi nuamtakin a ki bawl theih na ding inntek Siampi pa makaih siamna tawh Novena thu ngetna limtakin ki bawl den a hih manin ih Gamsung hun siat kawmkal pan Siampi suah pawi limtakin a ki bawl thei ahi hi.
Ih thu ngetna te a hong dawng ih Biak Pa Pasian tungah lungdam ih koh kawmin ih Kawlgam sungah mipite kisap thupha ahi ki uk na maan (Federal Democracy) a man langin ih ngah zawh nangin thu ngen in ih sep theih na mun ciat pan ma pang khawm ciat ni.