Pope kam vaikhak leh Vatican hungelna pawlkhat April 5, 2020

Alianbel Siampi Pa Pope Francis in Missa Biakpiakna a bawl laitak Photo by Vatican News

Pope Francis in Singhiang Siangtho pawi Nipi Ni Missa pen (COVID-19) hangin mitampi ki hel lo-in St. Peter's Basilica ah April 5, 2020 ni-in bawl in mun tuamtuam aa om mipite tungah A lianbel Siampi Pa Pope Francis in lauthawnglo in lametna tawh omding ci-in huihlak ki zopna Media te tungtawn in Singhiang Siangtho pawi ni-in St. Peter's Basilica pan in tha hong pia hi.

 “Tuni, Tu hun in hih a lau huai mahmah leh a min thang vangvang puul natna pen laulo tak leh Pasian tungah muan na tawh om ding hi hang. Khat leh khat ki khawlkhawm’ theilo, lung leng khuangai in ih om nate ah Jesu in eite khem peuh aa dingin ‘ lau kei-in, ka itna a hong luan nadingin na lungsim kongkhak hongin’ ci-in gen hi.

Topa Jesu in hong hehpihna tawh gimna a thuakna pen ei mimal khat aa ding bek hi-lo, Coronavirus puul natna hong pian khiatna hangin midangte tungah itna leh huhna Jesu in a hong hilh bangin ih sep theina ding hun zong ahi hi, ci-in a lianbel Siampi Pa in hong gen khia hi. 'Coronavirus hangin sihna a thuakte leh a nusiat a innkuan pihte aading in thu ka nget sak hi' ci hi.

A Lianbel Siampi Pa in Nipi Kaal Siangtho hun sungteng, Palm Sunday aa kipan Biakpiakna pen 11:00 am (Rome Time), 03:30 pm (Myanmar Time) in bawl ding hi.

Siangtho Nili (Holy Thursday) April ni 9 ni pen Topa Jesu’ a Nungzuipite tawh nitak an a nek khopna pawi Missa hun nitak 06:00 pm (Rome Time), 10:30 pm (Myanmar Time) in kipan ding hi.

A zingciangin, Siangtho Ninga (Good Friday) Ni pen Alian bel Siampi Pa in bawl ding aa, tua zan singlamteh lamzuihna a hih leh nidang aa a ki bawl ngei bang hi lo-in Vatican aa St. Peter’ Basilica maiah nai 9:00 pm (Rome Time), 01:30 am (Myanmar Time) in nei ding hi.

Tuabang mah in, Thawh kikpawi muakna Nitak Missa (Easter Vigil Mass) pen Vatican Basilica ah April 11 ni nitak 09:00 pm (Rome Time), 01:30 am (Myanmar Time) in om ding hi. A Zing ciangin Thawh kikpawi Missa (Easter Sunday Mass) Biakpiakna, “Urbi et Orbi” thutangkona leh thupha piakna pen a Lianbel Siampi Pa Pope Francis in Vatican Basilica ah hong nei ding hi.

By Mr. Anthony Piang

Crd: Vatican News

Add new comment

1 + 2 =