Pope Francis in Angelus thungetna pan Pasian leh mite aa dingin Topa Jesu bangaa a kipiakhia dingin Christain te zawn

A beisa nipi ni-in Angelus thungetna pan Pope Francis in Singlamteh puakna in Pasian leh ih lawm te na asem dingin a kipiakhia nuntak na hi ci-in gen hi. Nipini lungdamna Laisiangtho sungah Topa Jesu in a thuak ding gimna, sihna leh thawhkikna thu te a nungzuipi te kiangah gen hi. Nungzuipi te’ upna in citak nailo ahih manin Topa Jesu thugente a tel zawh loh na-uh Pope Francis in hilh cian hi.

Misiangtho Peter leh a dang nungzuipi te leh ei mahmah in zong Singlamteh pen pukna, tukna in ih mu hi. Topa Jesu adingin ahih leh Singlamteh pualo in pelhna in muktukna hi zaw hi. Banghang hiam cih leh Pasian deihna nialna hi ci-in ngaihsun hi. Tua thu hangin Topa Jesu in Peter kiangah “Satan aw, ka kiang pan pai khia in” na ci hi. Topa Jesu nungzui ahi nuamte adingin Lungdamna Laisiangtho sungah Topa Jesu in “Kanung hongzui nuamte in amah leh amah ki nial in, a ma Singlamteh pua in hong zui ding hi” ci-in ama nungzui suak ding te zuih ding thu hong hilh cian hi.

Hih Topa Jesu thugenna tawh ki zui-in Pope Francis in “Topa Jesu in nungzui man hihna namnih honglak hi. Ei leh ei kinialna in thuman kikhelna hi-in, ih Singlamteh puakna in nisim ih tuak haksatna te lungduai takin thuakna bek tham lo, gimna leh ze-et nate ahi hoihlohna te kantan zawh nadingin upna leh vaipuak khat tawh thuakna te ahi hi. Tua ban ah Singlamteh puakna in Topa Jesu tawh kigawmin leitung hotkhiat na hi,” ci-in gen hi.

Singlamteh pen eite in ih sanggamte’ na ih sepna, a diakdiak in a neupen khat leh a genthei pente na ih sepna pen Topa Jesu tawh ih kigawm nadingin ih lunggulh ciaptehna khat a hih nading, Singlamteh in Pasian itna thupitna ii ciamtehna, Topa Jesu ki piakkhiatna ahihna thu leh singlamteh manphat na thu te gen hi. Eite in Singlamteh ih et ciangin Topa Jesu in ama nasep vaipuak pen anuntakna piakkhiatna leh mawh maisakna ngah nadingin a sisan buakkhiatna tawh hong hon hi cih thu ngaihsut ding ki sam hi. Topa Jesu nungzui suah nadingin eite in ama sulzui in ih nuntakna sungah Pasian leh Pasian’thu-um mite adingin anungta te ih hih ding kisamhi ci-in Pope Francis in gen hi.

Lai let kik - Sr. Agnes Ciang Bawi

https://bit.ly/3bd6XrN