Philippines gam Manila ah Archbishop thak kikhan

A Lianbel Siampi Pa Pope Francis in His Eminence Jose Fuerte Cardinal Advincula pen Philippines gam Manila Khuapi aa Cardinal vaipuakna a nei dingin apna thu March 25 nitak nai 7 in Vatican in pulak khia hi.

Hih Cardinal pa pen March 30, 1952 kum in Capiz ah piang hi. Kum 1976 in Siampi suakin, Kum 2001 in San Carlos ah Bishop vaipuakna na nei hi. Kum 2011 aa kipan Capiz a cihna mun ah (Archbishop) Siadawpi in om hi.

Cardinal Advincula pen (Human Right) mihing khatin ngah dingin a ki lawmte ngah theina ding a hanciam mahmah khat hi-in, neih leh lam, a zawng leh a hau liangko kikim lohnapen mihingte nuntakna sungah a hamsa penpen hi ci-in gen thei zel hi. Pilna siamna pen mihingte khantohna bulpi hi aa, tua pilna hangin nuntak nading zonna sungah lawhcin na ahi hi ci-in mipite tungah a hanthawn phamahmah khat ahi hi.

A tuute a makaih siam leh Gam leh Lei, Pawlpi aa dingin a tup a sawmna Topa Pasian in a lawhcin sakna dingin thungetna sungah thuzuite'n phawk ciat ni.