Korea Catholic Pawlpi in St. Andrew Kim ii kum (200) cin suahni pawi bawl

Ref:Vatican News

Korea Catholic pawlpi in August (21) ni-in Korea pan amasa pen Misiangtho ahi St. Andrew Kim ii kum (200) cin suah pawi bawl uh hi. Amah pen 1821 kumin suak in, 1846 kumin si hi. Korea Siadawte kipawlna zumpi pan abeisa kum (2020 November 29 pan 2021 November 27) ni ciang, St. Andrew Kim suahni pawi pahtawina Jubilee kumin ciamteh in bawl uh hi. Tua Jubilee kum sung ading Motto in “nangin Catholic pawlpi upna zui-in anungta khat na hi hiam?” cih ahi hi.

Tua motto pen St. Andrew Kim a kimat lai-in a kidong kammal ahi hi. Tua bangin a dot uh ciangin Andrew Kim in “hi mah ing, kei-in Catholic pawlpi’ makaihnate zui-in anungta khat ka hi hi” ci-in hangsan takin dawng hi. Tua adawngna kammal in ama nuntakna lakhia hi. Aman 1846 kum, Sebtember 16 ni-in Seoul khuapi, Ichon-dong a om, Saenamteo munah angawngtanin thahna thuak hi. Tua hun pen Joseon kumpi in Catholic thuzuite abawlsiat mahmah hun hi. St. Andrew Kim in Siampi a suahzawh kha (13) asawt hunin thahna thuak hi.

Tua laitakin thahna athuak thuzui amah tawh kigawm (103) pha uh aa, numei (15) ki hel hi. Amau teng pen Pope St. John Paul II in 1984 kum, May 6 ni-in Misiangtho suahna tangko hi. Amaute pawi pen Sebtember 20 ni-in ki bawl hi. St. Andrew Kim ii kum (200) cin suahni pawi pen August kha (21) ni-in Korea gam a om biakinn (1750) ah Missa biakpiakna tawh kibawl hi. Coved19 hangin biakinn apai zo lo te ading Online pan Missa biakpiakna khah sak uh hi.

 

 

Add new comment

11 + 7 =