Kawlgambup Catholic Siadawte thu Kikupna pan Khensatna (2.10.2020)

Kawlgambup Siadawte kipawlna anihveina kum lang cin thukikupna pen Oct 2,2020 ni-in kibawlin tua sungah anuai aa bangin CBCM mintawh panmun kiteel thakna leh Tuucing Nasep tawh kisai khensatna te nei uh hi.
CBCM mintawh Panmun teel thakna tawh kisai in Kawlgambup Siadaw te kipawlna Makai pi dingin Cadinal Chares Bo, Sum kem Secretary dingin Bp. John Saw Yaw Han, mipi tawh kizopna commission makaipi dingin Bp. Peter Hla, Ngeina tawh kisai siamna leh kimawlna commission dingin Bp. Luka Dau Zel, Pawlpi tuamtuam kikupna tawh kisai commission Secretary dingin Fr. Maurice Nyaun Wai leh Christian te kipum khat na ding commission Secretary dingin Fr. Simon Tin Maung cihbangin kiteelna nei-in, hih vaipuak pen 2021 January kha pan kipan ding ci-in kipsakna nei uh hi.
Siampi sinna sangte tawh kisai-in Yangon Theology Sangah Laihilh kik thei ding cih ngimna tawh Professor te in Gamdangah Sangkah in lai sinbeh sakding ci-in a teelkhiat uh Sangnaupangte zong Siadaw te in thukimpih na nei uh hi. Tua ban ah Sangnaupang te Kha lam ah a makaih Siampi dingin Society of Divine Word Congregation pan Fr. Devasagayan Savariyappan a teel khit uh teh (2020-2021) kum sung Sangnaupang khat ai ding kumkhat in Sum (500,000/-) teng nga bei ding ci-in ciaptehna leh khensatna te nei uh hi. Pyin Oo Lwin Siampi sinna sangah hunbit laihilh dingin Fr. Patrick Alo leh Fr. Lucas Run Nai Uk (Hakha Diocese) kiteelin Loikaw Diocese pan Fr. Paul Pi Pi pen hunlang laihilh ding cihbangin kiteelna leh kipsakna nei uh hi. Taunggyi siampi sinna sanga dingin Mandalay Diocese pan Fr. John Htun Htun Naing pen thukhun tawh kisai vaipuak nei ding leh Pathein pan Fr. Bruno Klein Kot pen kha lam tawh kisai vaipuak nei dingin teelna leh kipsakna nei uh hi.
Evangelization Commission tawh kisai in Online pan Catholic Pawlpi ii honghilh thute hawmkhiatna vaipuak pen Archbishop Marco Tin Win, Archbishop Basilio Athai, Bishop John Hsane Hgyi, Bishop John Saw Yaw Han, Siampi sinna sangpan laihilh siampi te leh mipi tawh kizopna commission zum a nasem Fr. Peter Sein Hlaing Oo te kipawlin semkham ding cih khensat na nei uh hi.
Kawlgambup Khangno kipawlna pan Diocese kimah kiteenna tawh kisai, kiginkholhna tintan neih ding kisam hi ci-in a pulaakna te uh zong Siadawte in thukim in kipsakna nei uh hi.
Tuucing nasep tawh kisai lamlahna sungah Covid-19 natna hunsungin thuzui mite in a tuah khak hamsatna tuam tuam te sung pan a diak diak in kha lam tawh kisai in a Parish Siampi te uh tawh kizom ding cih thu leh Parish Siampi te a huh dingin hih anuai aa Siampi te panmun piakna nei uh hi. Thuzui mite leh Siampi te in zong kha lam tawh kisai-in Fr. Simon Tin Maung (09260589819) Fr. Myint Soe (095055985) Fr. Jerome Win Shew Gyi (09250185868, 09796949240) Fr. Peter Tun Tun (09795186544, 09250722445) Fr. George Shew Tun (09409999479) Fr. Stephen Aung Min (094081741700) Fr. Vitor U Thit (0931733663) Cih te tawh kizomin lamlahna leh thapiakna ngen ding cih kipsakna nei uh hi.
October kha pen adiak diakin Tonu beelin khikhin kha a hih manin khi lungngaih na ah Covid-19 natna leitung pan amanlangin abeisiang nading, kilemna leh thuman thutak tawh gamuk ding kumpi kiteel zawh na ding leh Diocese tuamtuam te ii ngimna te a tangtun nang ngetdingin hong tangko khia hi. Tua ban ah Online pan a kikhah khia Missa Biakpiakna leh siangtho pumpi biakna te ah kihel in thunget ding hong hanthawn hi.
A tawpna ah Catholic siampi sinna sang (Yangon & Pyin Oo Lwin) te pan Online Teaching Program tawh October ni 12 ni-in Online pan laihilhna kipan ding cih thute pulaak khia hi.
Sr. Agnes Ciangbawi (Kalay- OSC)
Credit: CBCM- OSC