Kalay Diocese sung thu thak te tangko na. (June, 2022)

St. Theresa Nungak Siangtho Kipawlna Phuatzawh Kum (25) Cin Silver Jubilee Pawi

The Little Way Sisters of St. Therese cih minpua Nungak Siangtho kipawlna a kiphuat zawh kum (25) cinna Silver Jubilee pawipi Lungdamkoh Missa Biakpiakna pen Kalay Diocese hongcing hongkem Bishop Felix Lian Khen Thang makaihna tawh May 1, 2022 ni-in Kalaymyo St. Theresa Nungak Siangtho te Sangpi (Mother House) ah kibawlin tua sungah Siampi (11) leh Nungak Siangtho (100) kim kihel hi.

St. Theresa Nungak Siangtho kipawlna pen tu (2022) kum ciang kum (25) hun sungin Puantual a ngahsa Nungak Siangtho mi (216) omta hi. Tua te sungpan khantawh kiciamna a bawlsa Nungak Siangtho (161) om in kiciamna abawl lai ding mi (55) pha uh hi.

Hih Nungak Siangtho te ii Sangkahna Formation Houses teng khempeuh pen Kalay Diocese sungah a vekpi-in om in Convent or Community House te pen a tam zaw Kalay Diocese leh Hakha Diocese te sungah om hi. Tu laitakin amaute ii Pasian nasepna Community House pen Kawlgam sungah (43) om in tua teng pen Diocese (5) sungah kikhen uh hi. Tua banah Philippines gamah zong Sangkah na ding ngimna tawh Community House khat nei uh hi.

Thuzak sakna

Rev. Fr. Raphael Suang Cin Khup (Procurator) in thuzak sak na nei in , Galtai cimawh Diocese aa huhna hong ngen mi (557) huhna ki pia khin hi . Parish sung ah gal tang a ci mawh zaw deuh te huh zawh zah in huh na pia lai ni ci hi. Cardinal Charles Bo ii huhna a hongpiak Buhtang ip (1000) pen Zone khat ah ip (200) ta in hong ki hawm khia ding hi cih thu te zong hong pulak khia hi.

Kawlgambup Siadawte Kumcin thu kikupkhopna nei

Kawlgambup Siadawte Kumcin thu kikupkhopna June 7-10, 2022 ni dong kibawl in Kalay Diocese Siampi lian Siadaw Felix zong ki hel thei hi. Siadawpa zong June kha 17 ni in cidam lungnuam tak in Kalay Siadaw huang hong tung kik hi.

Siadaw huang sung a om St. Patrick sang ki hong ta

May kha 13 ni a ki pan sang ki hong ta hi.. KG pan tan 4 dong ki kah in Sang nau pang vekpi gawm 200 val pha uh hi.

Assumption Inter Mediate Seminary ah Pasian thu Lungngaihna (15-18.20)

Covid-19 natna hang leh Kawlgam sung buaina hang tawh kum nih sung bang Minor Sang ki khak hi mah ta leh tu kum June kha pan in ki hong kik zo ahih mah in ih Biak Topa Pasian middle lung dam hang.

Minor Sanguk pa Rev. Fr. Robert Pau Gin Mung vaihawm siamna tawh Rev. Fr. Philip En Khan Mang (PP of Sakollam) in June 15 pan 18 ni dong sang nau pang te Pasian thu lungngaihna makaih ding hi-in zan nitak pan ki pan khin hi.

Hih Pasian thu lungngaihna picing takin a bawl zawh nang uh leh Sangnaupangte in Siampi a suah zawh nading in thu ngetsak ciat ni. Sangnaupang vekpi (51)pha hi.

Topa Jesu Si le Sa pawi ni (19.6.2022)

A Siangtho pen Topa Jesu Si leh Sa Pawi ni Rev. Fr. Maximian Pau Sian Mung (PP) makaihna tawh St. Peter & Paul Biakinn pi, Kalaymyo ah Siangtho Pumpi a Sangcil naupang (85) bang pha in thangah huai mahmah hi. Missa Biakpiakna a man ciangin Parish Siampipa in naupangte pahtawina laipi piakna nei hi .

Kanmagyi Khua ah Nungak Siangtho Suahna pawi le Chrisma han tawh na leh Tonu suang buk thu pha piak na om (19.20.6.2022)

June kha 19 ni Kammagyi khua St. Anthony of Padua pawipi mi sung ah Chrismas hanthawn mi 50 bang in ngah thei hi.

Tua khit the Kammagyi biakinn a om Tonu Suang buk zong Siadawpa in thu pha piak na nei hi.

June kha 20 in St. Theresa Nungak Siangtho (6) in Kanmagyi Khua ah Nungak Siangtho Suahna ngah a hih manin ih Biak Topa Pasian tungah ih lungdam hi.
A maute pen
1. Sr. Catherine Lam Hoi Nieng ( Heng Zang)
2. Sr. Veronica Man Sian Muan (Tuidil)
3. Sr. Magdalena Om Tii ( Kanmahgyi)
4. Sr. Lucia Pai Tam (Kanpetlet)
5. Sr. Mary Niang Khawl Khup (New Haimual)
6. Sr. Esther Lam Ngai Nieng (Thingpiel)
te a hi uh hi.
Hih Nungak Siangtho suahna pawi pen Kanmagyi khua ah a ki bawl masak na hi-in thu zui mite in tha ngah thei mah mah uh hi.
Hih pawi ah Siadawpa, Siampi (16) leh thuzui mi (500) kim kihel thei hi.
Inntek Siampipa Rev. Fr. Alphonsus Ngul Kho Mang makaih na tawh Nungak Siangtho te Pahtawina letsong piakna zong kinei hi.

Biakinn thak thupha piak na (23.6.2022) Khampat

Khamphat zone, Khampat amat (4) ,St. Felix biak inn thak hon pawi ah Kalay Diocese hong cing hong kem Siadaw Felix in Biakinn thak thupha piak na nei hi.

Sawbuan ah Phawkna Mual suang kiphutna ki nei

Sawbua Parish acing a kem Rev. Fr. Joseph Lalngilneia ii makaihna leh vaihawm siamna tawh a hong nusia sa Rev. Fr. Florian Zam Kho Kam leh Rev. Fr. Timothy Thang Do Cin te ii leitung hong nusiat zawh kum (1) a cin ni (June 24) ni-in a maute kha ding missa biakpiakna pen St. Anthony of Padua biakinnpi sung a kibawl hi.

Missa biakpiakna sungah Siampi (70 ) Nungak Siangtho te leh thuzui te vekpi gawm (300) kim pha hi.

Missa biakpiak na aman khit ciang in biakinn pua lam Tonu suangbuk maiah a hong nusia sa Siampi te nih phawk na mual suang thupha piakna pen inntek siampipa Rev.Fr. Joseph Lalngilneia in makaih hi. Biakinn tual ah Mualsuang thupha piak na ki nei hi.

Topa Jesu Siangtho Lungtang Pawi (26.6.2022)

Topa Jesu Siangtho Lungtang Pawi ni pen Rev. Fr. Damian Zam Sian Dal (PP of Sacred Heart Church, Phai) ii vaihawm siamna tawh Kalay Diocese hongcing hongkem Bishop Felix in Siangtho Lungtang Biakinn Pawi Missa Biakpiakna pen Phai, Hlaingthaya ah bawlsak hi.
Hih Missa Biakpiakna sungah Siadawpa leh Siampi (6) in makaih hi. Missa Biakpiakna hun sungin Siadawpa in Siangtho lungtang pawi a hih manin itna tawh kisai bulphuhin kha-an vakna nei hi.

St.Theresa Nungak siangtho te innthak thupha piak na (Munlai 27.6.2022)

Rev. Fr. Robert Kam Kho Hau (PP of Munlai St. Peter's Church) ii deihsakna tawh Munlai ah St. Theresa Nungak Siangtho te om na ding innthak khat kilam in Siadawpa in thupha piakna nei hi. Hih inn sungah Nungak Siangtho (4) om ding hi. Hih Munlai Parish sunga Nungak Siangtho te nasepna te a tangzai zawh semsem na ding thunget sak ciat ni.

Kalay Diocese Ngahzawh Kum (12) Cin Lungdamkoh Missa Biakpiakna (29.6.2022)

Kalay Diocese ngah zawh Kum (12) cin lungdam koh missa pen Sts. Peter & Paul biakinn pi ah Kalay Diocese hong cing hong kem Siadaw Felix leh Topa te in Lungdam koh Missa biak piak na nei hi. Tua teng ah Sts. Peter & Paul pan naupang (150) in Christmas han thot na ngah hi.

Kalay Diocese pen Hakha Diocese pan in 2010 kum June 29 ni-in Bishop (1) leh Siampi (37) tawh Inntuan khia hi.Kalay Diocese sungah (2010-2022) Kum (12) sunginSiampi a suak thak – (30) pha hi.Siampi nasepna pan a tawp kik – (4) om in Pa Pasian kiang a hong ciah san – (7) om hi.Tu laitak pen Kalay Diocese sungah Bishop (1) leh Siampi (59) om hi.Hih Siampi (59) lak pan

Gamdang ah pilna a sinbeh (Rome, Germany, USA, Philippines) te ah a tungkhin sa te leh a sawt lo in a pai lai ding Fr. David Lian tawh a kigawm – 9 om hi.Thuzuite akem dingin Gamdang USA ah (3) leh Malaysia ah (1) om hi.

Yangon, CBCM aa om Fr. Dominic Langh tawh a kigawm Major Sangte ah Professor a sem Siampi (4) om hi.Tu laitak Kalay Diocese sunga om Siampi vekpi gawm (44) pha hi.

Hih (44) lak pan (Diocese Office) Zum na sem Siampi 8 om in tua lo (36) te in Parish ah na sem uh hi.

Kum (1) Cin phawk na

29.6.2022 Ni Msgr. Martin Suan Khan Mung hong nusiat zawh Kum (1) cin phawk na missa biakpiakna Tahan St. Theresa Biakinn ah Zingsang nai 6:30 in Fr. Joseph Kap Tung Nung makaih na tawh missa biakpiakna ki nei hi.

Kalay Diocese sung ah om Topa te Half Year meeting ki khop na

Kalay Diocese sung ah om Topa te Half Year meeting ki khopna pen (June )30 pan in July ni (3) dong meeting om in diocese sung ah om in Fr. Phillip En mangsim loh a dang Topa tenga vek in ki hel thei hi. Fr. Phillip En Mang pen a mit dam loh na tawh hong ki hel thei lo hi.Diocese sung a om Topa te ading a om na tek pan in thu nget sak ciat ni.

Add new comment

4 + 1 =