Diocese Centre aa Zum Nasemte Pasianthu Lungngaihna(25.11.2022)

Tuni Pasianthu Lungngaihna hun sung leh Missa Biakpiakna hun sung te ah Rev. Fr. Paulinus Thang Muan Lian in thugenna hong nei hi.
Amah in (Eph 6:7 )
"Mihing nasem bang hi loin Topa nasem bangin na lungsim takpi uh tawh na sem un" cih Laisiangtho Pasian Kammal bulphuhin "Faithfulness to God and Man" Pasian tungah cihtakna leh Mihingte tungah cihtakna neih ding a kisapna thu te hong gen hi.

Amah in cihtakna ih cih pen mihing khempeuhte ii neih ding a kisam ahihna thu leh ih cihtakna tungtawn in Pasian in eite tungah thupha a hongpia a hihna thu Abraham, Noah leh Mosses te ii nuntakna genteh in hilh cianna nei hi.

Tua banah Lungduaina neih ding a kisapna thu agen na ah "ih sep ih bawlna khat peuh peuh ah mite nasem in ki ngaihsun lo in Pasian nasem in ki ngaihsun leng ki lungduai zo zawdiak hi" ci-in Zum nasemte thapiakna nei hi.

Missa Biakpiakna pen Rev. Fr. Raphael Suang Cin Khup in hong makaih hi. Tu (November) Kha pen Gimnaneu sunga om Kha te aa ding thungetsakna Kha a hih manin Khikhin na leh Missa Biakpiakna te pen hong nusia sa thuzuite Kha te aa ding leh Myanmar gam sungah Ki Ukna man Democracy a manlangin ngah in kilemna len khantohna a om nang bulphuhin ki ngen hi.

Hih Pasian thu lungngaihna ah Siampi (4), Nungak Siangtho te leh Zum nasemte vekpi gawm (30) kim kihel thei hi. Kikhop manciang Diocese panin hong piak khiat sun-ann nekna tawh hun te ki man siang hi.