Velankanni cidamna Tonu Pawi. (September- 8.2022)

Kumzalom (16) hunin India gam, Velankanni khuano khat ah meigong nupi khatin apian limin akhe abai tapa khat nei hi. Tua akhe bai atapa pen nupinu in nisimin khua nawl Mawngkung nuaiah Bawngnawi zuak sak zel hi. Khualzin mite in tua nuapang pa zuak Bawngnawi lei-in dawn den uh hi. Nikhat, amel ahoih mahmah numei khatin atano tawi kawmin naupang pa kiangah Bawngnawi hong ngen hi. Naupang pa in sum ngah lo-in a Bawngnawi bei leh a Nu in a tai ding a lau hangin phalna takpi tawh a Bawngnui Numei nu pia hi. Tua hun pen sun nisat mahmah hun hi a, mi a tawm mahmah laitak hi. Numeinu in a daangtaak mahmah atano Bawngnawi a dawn sak khit ciangin Bawngnawi zuak naupangpa kiangah Khuapi sungah va pai mengmeng inla, mi khat vasap sakin ci-in sawl hi.
Naupangpa in akhe bai ahih manin lam pai zo lo hing cih a gen leh numeinu in atawi atano a et khit ciangin naupang pa kiangah “ding to inla pai in” ci-in thu a pia hi. Bawngnawi zuak naupangpa zong a ding toh leh a khe dam pah hi. Tua ciangin naupangpa in lungdam, kipak takin tua numeinu sawlna bangin khua sungah tai pahin numeinu sapnop mi pa va sapsak pah hi. Numei nu in a sapnop mi kua hi cih a gen loh hangin naupang pa in a lungsim sungah thei pah hi. Tua mi pa kiang a tun ciangin naupangpa in ama tunga thu piang teng gen pah a, tua mipa in zong naupang pa sapna ah zui pah hi. Bang hang hiam cih leh tua mipa ii mang sungah Tonu Maria in a gen sa ahi hi.
Mawngkung kiang atun uh ciangin Tonu Maria in Mawngkung gei ah ama adingin Biakinn khat a lam na dingin gen aa, tua khit ciangin mang pah hi. Tua thu manlang takin kizel pah a, mite in Tonu deihna bangin tua lai ah Biakinn no khat lamin Tonu lim koih uh hi. Tua Biakinn ah thungen apai khut leh khe damlo mi tampi in damna ngah uh hi.
Kumzalom (17) hun ciangin Potugal sum zong te, Tembaw tawh apai laitak un lamkal ah huihpi leh tui hualpi tuakkha hi. Amau pen Catholic thuzuite ahih mah bangun Tonu kiangah huhna ngen uh hi. Hih huihpi sung pan nong hotkhiat leh Tonu min suangin Biakinn khat ka lam ding uh hi ci-in zong kiciam hi. Tua bangin a ki ciam khit phetun huihpi leh tuihual zong dai pah hi. Ni tawm khat khit ciangin sum zong te Velankanni khua ah tung uh hi. Gun kuang tungpan tuak in lampi atun ciangin amau leilak ah khukdinin Pasian leh Tonu tungah lungdam a koh khit ciangin amau kiciamna bangin Biakinn lam dingin angaihsut laitak, amaute kiangah Tonu hong kilang in Mawngkung gei aa khua mite in alam uh ahi, biakinn no mun mah ah Biakinn alian khat a lamsak nading a gen khit teh mangkik pah hi. Tua sum zong te in zong Tonu deihna bangin ahoih mahmah Biakinn lianpi khat tua lai ah lamin Tonu tungah tua Biakinn ap hi.
Potugal sum zongte Velankanni ah a tun ni pen September (8) ni, Tonu Maria suahni ahi hi. Tua ahih manin tua ni pen India gam ah Velangkanni Tonu pawi-in ciamtehin kumsimin nasia takin Tonu pahtawina pawi bawl uh hi. Tonu in India gam mi tampi takte a dingin tua khua ah hehpihna tampi lak hi. Pumpi, kha cidamna tampi pia hi. Tua hun pankipan tu ni dong ciang, tua munah thungen apai mi bei ngeilo hi. Velankanni Tonu zahtak piakna ah alamdang thu khat in kum sim tua Pawini a tun ma Novena bawl hun pen Novena dangte bangin ni (9) hi lo-in ni (11) ki bawlzel hi.

Add new comment

1 + 1 =