Tuithang Khua ah Roman Catholic Pawlpi Hongtun Kum(75)cin' Diamond Jubilee Pawi (7.4.2024)

Jubilee Pawipi ni Mualsuang thupha piakna leh Lungdamkoh Missa Biakpiakna ki bawl hi.
Hih pawi sungah Pawisim pen Khua (32) pan ki pai-in, Khual pan Pawisim mimal (800) val pha ahih manin inntek khua te tawh pawi sungah mi tulthum (3000) kim ki pha thei ding hi.
Siadawpa leh Siampi te (18), Nungak Siangtho te (12), Tangval Siangtho te (5) leh Thuhilh Sia mi (28) pha uh hi.
Pawi sungah Sial (10), Vok (7), Kel (2), Sakhi (1) leh Ak pen a kisam bangin kigo in Pawisim te pen zintun ni pan zin ciah ni dong annek tuidawn lim takin ki vak hi.
Jubilee Pawipi ni pen Pawlpi tuamtuam pan Pastor te leh (VIP) tengin ankuang umm khopna a neih banah Khua sunga om teng zong an ki vak in nekledawn pen kicing mahmah hi cih thu inntek te leh Pawisim te tung pan kiza hi.
Saturday ni leh Nipini nitak lenkhopna nasia takin ki bawl in Monday ni zingsang in Christmas Hanthotna piakna naupang (100) val in sang uh hi.
Monday ni Missa Biakpiakna khitteh zing an kine in tua khitteh mipite inn lam zuan in lungnuam takin ciah uh hi.
Pawi hun sung bang mah buaina omlo in nuam tak in ki mansiang a hih manin ih Biak Topa Pasian tungah lungdam ih ko hi.