TO THUM PASIAN KHAT PAWINI. (26.5.2024)

Pasian a um ulehnau te, tu ni’n ah, ih upna thu sungah a thu thuk pen pen ahi, To Thum Pasian Khat thu a ki kum ding hi hang. Hih thu pen a thu thuk pen pen, Pasian’ mah mah ii pianzia hi’n ah mihing ii ngaihsut zawh, tel gen zawh thu hilo a hih manin Topa Pasian mah mah in telsiamna leh up siamna hong guat dingin a ama’ tung mah ah ih ki-ap kul hi.
Pasian pen a lamdang a vanglian Pasian a hih manin ei ii tel baan zawh hi lo hi. Mihing nam tuam tuam te’n ih theih baan zah ciang tekin Pasian ih nei tek a, ih muh daan leh ih theih daan ki kim lo a hih manin ih biak daan leh ih zuih daan zong ki kim lo, ki banglo hi. A minam dang tuam tuam te ii pasian tuam tuam te gen ta kei leng, ei Pa khat suan a ki ci thei, Abraham suante nangawn ih up ih zuih daan ki banglo hi. Arab minam ih cih te zong Abraham ta, Israel’ suante hi’n ah, a hi zong amau up daan a tuam khat hi.
Abraham suan Isaac, Isaac suan Jacob hi’n ah, tua Jacob pan Israel cih minam min hong piang ahi hi. Tua hi’n ah, Israel minam khempeuh ii Pasian pen Abraham Pasian, Isaac Pasian, Jacob Pasian na ki ci hi.
Christian te’n ih biak Pasian pen tua Pasian mah ahi hi. Ahi zongin ih gen sa mah banga, Pasian pen vanglian lua, thu thuk lua ahih cianga, a eiteng nangawn ih theih daan leh ih zuih daan them them in ki lamdang dang lai hi.
Israel mi, Judah mi te’n pen, Topa Jesu saanglo uh ahih cianga Mesiah hong pai nai lo hi, ci a ngaih sun uh. “Tua teh, Moses thukham banga, sabbath tang, Laisiangtho lui zangin, a mau’ ki gin’ ni uh, ni nga ni ta, nitak lam nai thum pawl ta teh, “Mesiah aw hong pai meng in,” ci a thu ngen zel uh hi.” Amau te’n Topa Jesu umlo ahih teh, “To thum Pasian khat” cih pen umlo uh.
Ei Christian te sung nangawn ah “To thum Pasian upna leh uplohna tawm tawm ki bat lohna om lai hi. Ahi zong Christian a tamzaw in pen Tothum Pasian mah ki um zaw hi. Tua sung pan pawlkhat te’n pen “Thum gawm Pasian” aih kei leh, “nam thum Pasian” ci uh.
Catholic Pawlpi’n bel “To thum Pasian khat” ci’n um in bia uh. Cih nopna ah, na khat peuh peuh thum a kigawm teh Pasian piang hi, cih hi lo-in Pa tawh Tapa tawh, Kha Siangtho tawh, hih “To” thum kigawm Pasian hi cih na hi. Tua To thum Pasian pen na khempeuh a piangsak, a uk pipa hi a, a mah tawh a ki za kim, a ki bang khat beek om lo, tehpih ding om lo-in a lian pen “To” za nei hi. Pa zong Topa, Tapa zong Topa, Kha Sianghto zong Topa, a vekpi in Topa vi ve hi a, a kigawm teh a vanglian pen Topa Pasian hong suak hi. Amau khat ciat pen Topa lah hi, Pasian lah hi a, a ki gawm teh zong Topa Pasian khat mah hi. To thum hi na pi, Pasian thum hi lo-in To thum Pasian khat suak hi. Hi pen Pasian ii thu thuk penna leh a vangliatna pen hi a, mihing te’ telzawh hi lo hi. Tua ih telzawh loh pen Pasian a vangliatna hi zaw a, Pasian ahihna hi zaw hi.
“Thum” pen leitung thu ah zong a ki thupi ngaihsut nambat khat hi lui lam hi. Gehtehna, pasal hon khat in na lian khat a sep khop teh, a tha uh a ki khat theih na dinga, khat..nih..thum ci-a simse ai ve. Thu kimna khat peuh peuh zong a ki laak teh thum vei ki taangko, ki dong ciat ciat se hi. Tua hi’n ‘3’ pen mihon khat ki tha khat suahna lim hi gige hi.
Biakna ah zong ki khopna ding daak ih sat teh thum vei ta ki sat se hi.
Laisiangtho sungah “3” tawh kisai enleng, Mangmuhna sung leh Isiah 6: sungah vantungmi te leh misiangtho te’n Topa Pasian aphatna ah, “vanglian Topa Pasian in siangtho hi, siangtho hi, siangtho hi,” ci-in phat hi. John masa 5: 7 sungah Topa thu ah teci apang thum om a, tua te in khasiangtho, tui leh sisan te hi. Hih thum te teci panna ki bang kim hi ci hi.
Sawl 10: 11 na sungah, Peter in mangmuhna khat nei hi. Tua mangmuhna sungah, Gentail mite kiangah lungdamna thu a hilh ding in Pasian in “thum” vei nasawl hi.
Topa Jesu a kimat nizan in Peter in “3” vei nialkha hi. Topa a thawh kik khit ‘3’ vei a kilahna ah, Peter aw mi’ it sangin nang nong itzaw hiam ci’n 3 vei dong a, Peter in zong, Topa hong it ing, ci-in 3 vei mah dawng kik hi. Topa in Tuu cin’ za ‘3’ vei ap hi.
Gimthuak a kipat nitakin Gestmani huanah Topa Jesu in ‘3’ vei thu ngen hi. Nasep a kipat ciilma in sehnel gamah dawi mangpa’n nam ‘3’ tawh na ze-et a, a 3 vei mah in Jesu in na zo hi.
Topa Jesu suah laitak in mipil ‘3’ te’n letsong nam thum tawh na bia hi.
Israel mite Egypt panin suahtakna a makaih ding Pasian in Moses a sawl lai-in sawlbawk kuang sung pan hi bangin Pasian na ki pulaak hi. Kei pen Abraham Pasian, Isaac Pasian, Jacob Pasian ka hi hi, na ci hi. Abraham tungah minam khempeuh ii “pa” suah nading a gen dingin Pasian a pai laitakin, mi thum in a ki lahna thu Gen 18: na sungah ki mu hi.
Pasian in mihing bawl ding thu a vaihawm laitak in, “Ei ma lim, eimah hong suunin mihing bawlni…” ci-in kikum hi. Eden huan pan mihing in mawhna abawl khit ciang leuleu in, “en un, mipa pen, eite khat tawh ki banga, a pha leh a sia thei hi, amah in nuntakna singgah ne in a hin tawntung khak lohna dingin, ih vaihawm ding hi,” ci hi. Hi munte ah Pasian pen a kikum khawm, a vaihawm khawm khat hi, cih ki mu thei hi.
Topa Jesu hong pai ma-in To thum Pasian cihin ki lang khia nailo, ki mu nailo hi. Topa Jesu hong pai ciang in To thum Pasian a hi gige ahih lam hong ki thei pan bek hi. Luke 1: 26-27 sungah, Maria kiangah, Pasian in a vantungmi Gabriel asawl hi, ci hi. Maria pen Kha siangtho in gaaisak in, Jesu paai hi. Hi thu teng ih et teh, Vantungmi Gabriel asawl pen Pasian hi, ci a, Maria a gaaisak pen Kha siangtho hi-in, Maria ii a paai ta pen Jesu hi. Mihing mitmuh leh bil a zak theih dingin Topa Jesu tui kisawp laitakin To thum Pasian a teltakin hong kilak tel hi.
Topa Jesu tui ki sawp in, tua laitakin van ki hong in Kha siangtho vakhu limin hong kilang a, van pan a aw ging in, “Hih pa pen ka lungkim mahmah na ka Tapa ahi hi,” ci hi. Hi munah, van pan a awging in “Pa” dinmun hong la hi. Ka tapa a cih pen Jesu hi a, vakhu lim a ki lang pen Kha siangtho hi. Tua hi’n To thum Pasian pen ei ii bawltawm, upmawh sansaat hi lo-in Pasian ii pianzia leh a omdaan, ahih daan hi. Tua baan ah a min kilawhna Pa, Tapa, Kha siangtho cih zong ei ii bulh tawm vawhtawm hi lo-in Pasian ii kibulh ki vawh a zui ih hi hi. Topa Jesu hong pai ma pekin hih thu thuk na ki lak khin hi. Ps 2: 2 na sungah, TOPA leh a ma’ sathaunilhpa cih pen Christu, Jesu Topa Pasian ahi hi. Ps 2: 7 sungah, “Nang pen ka Tapa na hi a, tu ni-in na Pa ka suak hi, ci-in Pa leh Tapa pen pum tuam khat tuak ahihna ki mu hi.
Jordan gun ah tui kisawp tungin hitaleh, Tabor mual ah meel ki khel tungin hitaleh, van pan in aw tawh Pa in Jesu pen “ka it ka Tapa” ci khia hi. Jesu’ a suah pankipan a sih dong ciang a lungdam ni, a ki paak ni, a lungnop ni, a lunggim ni, a lung kham ni, a khempeuh in a Pa tawh ki ho den, ko den in “Pa aw” ci den hi. A tui kisawp ni-in Pa, Tapa, Kha siangtho, To thum hong kilat kim mah bangin eite zong tua To thum ahi, Pa, Tapa, Khasingtho tawh tui kisawpa amau sungah ih thak suah dingin a thawh kik khit vantung a kahtoh dingteh thu hong nusiat hi. Amah vantung kahto in Pa Pasian ziatlam ah om hi ci-in sawltak Steven in zong a sihma in mu hi. Mangmuhna Laisiangtho 4: leh 5: te ih sim ciangin vantungah Pa Pasian tawh, Tuu no tawh Khasiangtho tawh atuam tuak aa a om na thu ki mu hi. Mang 5: 7 sungah, Tuuno vapai a, tokhom tungah a tu pa in a taklam ah a tawi lai zial a va la hi, ci hi. Tua ahihmanin Pa, Tapa, Kha siangtho te a tuam tek hi a, To thum ki gawm Pasian khat ahi hi.
Ih thu genna te Pasian kammal khat tawh khupni. Mang 5: 13-14 na ah, “Tua ciangin vantung, leitung, leinuai, tuipi sunga om, a kipiangsakte khempeuh in: “Kumpi tokhom tunga tupa le Tuuno in phatna, pahtawina, minthanna le vangliatna a tawntungin ngah ta hen!” ci-in a ot uh ka za hi. A nungta ganhing lite in, “Amen,” ci uh a, upate in zong bokin a bia uh hi.”