Siangtho Pumpi Pawini (June 19. 2022)

Siangtho Pumpi ih cih pen bang hiam?
Siangtho Pumpi ih cih pen Topa Jesu ii si leh sa ahi hi. Ama Pumpi a ki ne ahi hi. Bang hang hiam cih leh Topa Jesu in “Ken aman tak in kong gen in ah mihing’ Tapa sa na nek kei uh aa, a si na dawn kei uh leh note sungah nuntakna omlo ding hi. Ka sa ne in, ka si a dawn te nungta tawntung ding aa, nitawp ni ciangin ka hing kik sak ding hi. Ka sa nei in, ka si a dawn te kei tawh pumkhat ahi hi.” (Jn 6: 53-54) na ci hi.

A nungzuipi te tawh nek khawm pawi in Topa Jesu in anlum la-in lungdam a koh khit ciangin balnen in a nungzuite tungah pia in, “Ne un, hih pen kei ma pumpi ahi hi a ci hi. Lenggahzu zong hai tawh la-in ama si a suak sak khit ciangin a nungzuipi te kiangah hi pen keima si ahi hi, la unla dawn un” (Mk 22: 23) na ci hi.

Topa Jesu in Pasian ahih manin hih theih loh nei lo in a cih bang bang a piang ahi hi. Tua bangin, hih in ka sa ahi hi, hih in ka si ahi hi a cih hangin ama ii mihing pumpi a sehsat hi tuan lo hi. Topa Jesu pen Pasian ahih manin a cih bang bang a piang ahi hi. Nili sung bang a si sa ahi, Lazarus zong tho kik sak thei hi. Cina te zong dam sak thei in, dawi zong hawlkhia thei hi. Amah pen “Thu” ahih manin a kampau te zong a cih bang bang a piang ahi hi.

Suangtum khat zong hih in ka sa ahi hi. La unla ne un hong ci leh ahi pah ding ahi hi. Ei nial theih omlo hi. Hi thei kei in the ki ci thei lo hi. Bang hang hiam cih leh ama cih bang bang apiang ahi hi. St. Paul in zong nungzuipi a hih loh hangin nek khawm bawl theih nading thu Topa Jesu kiang pan in thu a ngah hi. Anlum ne in hai sung pan in leenggah zu na dawn sim un, Topa a hong pai kik mateng in a ma sihna thu a gen gen na hi uh hi ci ahih manin tua nek khawm pen leitung bei dong in bawl ding cihna ahi hi. Tua nek khawm pen a ki lawm lo pi-in na ne kei un ci lai hi. Mawhna nei pi pi-in tua Topa Jesu si leh sa ne thei lo ding a cihna ahi hi.
Siangtho Pumpi tungah itna leh zahtakna om tawntung ta hen.

Add new comment

11 + 8 =