A siangtho Khi thungetna kumpinu pawini. (7.10.2022)

Khi thungetna kumpinu pawini pen AD-1571 kumin Misiangtho Pius V na in Lepanto khua, gun tui galkido na ciapteh na dingin abawl ahi hi. Tak minam te a zo Christian tui galkap te gualzawhna in Tonu panpihna hang hi ci-in ki ciamteh hi. Tonu hehpihna pen asiangtho khi thungetna pan kingah hi. Tuan PuPa te gen na ah hih a zahtakhuai khi thungetna pen Tonu in St. Dominic tungah na genkhia hi.
Salan (Late) nambat tawh a ki bang, Ave Maria khi thungetna tang (150), tu-in tang (200) pen tua hunlai in kuamah in tel zo lo uh hi. Ave Maria thungetna a gual masa pen St. Luke lungdamna laisiangtho sung pan ki la a, a gual nihna pen tuan Pu Pa ngeina, ciaptehna sung pan ki la hi. Lungngaih ding thuthuk nam (20) te ahi, Lungdamna, Dah huaina, Minthan na leh Vaangtaang thuthuk te in Tonu Maria leh Topa Jesu ii nuntakna sung a thu piang te lak pan a thupi pen te hong lak hi.
Paulu VI in thuthuk te ngaihsun lo in khi khen na in nuntakna nei lo mi tawh kibang hi ci-in gen hi. Italy gam aom, Luyithu khua biakinn pan a ki bawl Litany te pen AD-1592 kumin khi thungetna ah hel in ki ngen hi. Khi (10) ih man sial in ih nget ahi, (ka Topa Jesu aw, ko te mawh na hong maisak in…..) cih pen AD-1917 kum, Fatima khua naupang thum te kiangah Tonu a ki lahlai-in ahilh thungetna ahi hi.
Thu ngetna khat bek nget kikkik na in ninghuai hi a ci mi te, ih theih sak ding thu khat ah, lawm ki ngai te in “hong ngai ing, hong it ing” cih kam mal a gengen uh hangin ning cih aom ngei loh na thu hi. Bang hang hiam cih leh a siangtho khi-in ki-it na lim lah na hi.
Khi thungetna kumpinu aw…ko te adingin thu hong ngetsak tan.