Rev. Fr. Joseph Pau Kap Mung ii Siampi suah kum 26 cin thugen na

The 26th Ordination Anniversary of Rev. Fr. Joseph Pau Kap Mung (17.4.2020) Christu sung ah kong it u leh nau te aw (tuni pen kei ading a lungdam huai leh ki pak huai ni ahi hi. 1994 Apirl 17 ni-in Tuithang khua ah Siampi Lian Nicholas Mang Thang khut tung pan Siampi za ka ngah aa tu kum in kum (26) a cing ta hi. Ih biak Pasian, ih Tonu, ka min tap St. Joseph tung leh hi bang aa hun hong pia RVA Tedim Chin Service innkuan, tung zong lungdam kong ko hi. Tuni kei ading Missa hong bawl sak Siampi te, thu hong nget sak mimal khempeuh tung ah lungdam kong ko hi. Topa’n thupha hong pia ciat ta hen. Halleluiah ! Ka thu mei let pen “ Note in kei na hong teel kei uh a, kei mah in note ka hong tel hi” (Jn 15:16) Pilna, Siamna , neihsa, lamsa en lo in Pasian in ama ngim na tawh hong teel hi cih ka phawk semsem hi. Pro. Jeremiah kiang ah Yahweh in “ Na nu sung na om lai in kong teel khin hi” ci hi. (Jer 1:5). Tua ahih man in ei khat ciat pen Pasian deih na tawh a piang ih hih lam ki thei tel siam ni. A sia apha a khen tel thei mihing ih hih man in hak sat, gen theih na leh ze-et na zong ih thuak zeelzeel hi. Biakna nasem te in thuak pha deuh leeng ki lawm kasa hi.Tua ze-et na pen pelh theih thu hi lo aa Topa min suang in a mah tung ki-ap in ki niam khiat na tawh thuak ding hi mawk hi. Bang hang hiam cih leh Jesu Pasian na ngawn in a na thuak a hi hi. Ei RC te bang tu a Pasca sung in ih zak Pasian kammal te, ih bawl biak piak na te tung tawn in ih tel thei hi. Jesu pen Pasian hi-aa, hong piang sak pa ahi hi. Pasian in Is 64 sung ah, kei in beel seekpa ka hi aa, note tung man na hi uh hi. Tung man in beel seek pa kiang hong tua ci bawl in cih theih na thu ih nei kei hi. Misiangtho Paul ii thugen bang in ih san siam ding ki han thawn hang. Rm 14:7 ih nuntak leh Topa ading in a nungta hi a, ih sih leh zong Topa ading mah in a si ih hi hi. A piang bangbang san siam ni thu zui te aw. Kei ki hehnep na khat ah Misiangtho Paul in 1 Cor 10:13 ah “ No te thuak zawh loh ding ze-et na hong thuak sak lo ding hi” aci hi. Ih Biak Pasian in hong tel lua hi. Lung kia kei ni. “ A thupi ah nungzui pi Andrew bang in, “Topa aw ka up na ah hong khauh sak in” (Lk 17:8) Cih ding lo ngal om lo hi. Tuni lungdamna Lai siangtho tawh ki kum leeng u ting. Jn 21:1-14 pen kei nuntak na tawh ki bang kasa hi. Nuntak pih huai kasa mahmah hi. #rva, #rvatedimchinservice, #kalaydiocese, #zomicatholiconline, #Inspirations,