PASIAN HONG ITNA

Pasian in leitung mite it mahmah ahih manin a Tapa a um mi khempeuh kisia loin, nuntak tawntungna a ngahna dingin khat bek a neih a Tapa a pia hi. (Jn 3:16)
Hih Lai Siangtho kammal in Pasian in leitung mite bangzah taka hong it cih pen hong kilangsak hi. I lungsim hong nuamsakin thakhauhna zong hong pia hi.
Tua hi a, Pasian in a Tapa khat neihsun leitung mite aading hong bangci piak a, hong piak manin bangzahin nasa ding cih pen kuamah in thuk takin i ngaihsun kha ngei kei hi.
A zenzenin Pa Pasian in a Tapa hong pia lo hih leh leitung mite bangci nuntak ding, bang suak ding cih pen deihpha takin ngaihsun leng dahhuai mahmah hi. A lauhuai a lipkhap huai, a dipkuat huai mahmah thu hi napi-in, eite in ol ngaihsut, zangkhai ngaihsutin, Pasian in a Tapa hong piak mah ding hi e, ahi mah ding hi, a tavuan hi ven, a ci bang keek khatin i ngaihsun thei kha hi.
A taktakin Topa Jesu le leitung mite' mawhna a kisaina, a kimematna bangmah bangmah omlo hi. Leitung mite' thuak ding, sih ding tangin a thuakna ding, a sihna ding thu cinvom cia zong omlo hi. Hong pai kei henla hong tan ta kei leh zong ama aading a phatmawhna bangmah omlo hi.
Pasian in Adam le Eva tungah “sia le pha khentel theihna singgah na nek uh leh na si ding uh hi” (Pian 2:17) hong cih thei gegu napi-a i nek teitei ahih manin i sihna tungtang ah Pasian i mawhsak theih nang thu bangmah omlo hi. Kuama bawl a kisia hilo, ei le ei kibawl a, a kisia ihi hi. A siangtho kilkel, paubanna a neilo Pasian' tanu tapa ahi kimlai thuman lohna hangin mawhna tawh a kidim, a kihhuai mahmah dawi mangpa' tanu tapa i suak hi.
Tua hi a, mihingte dawi mangpa' khut sung pan i suahtak kik theihna ding lampi om nawnlo hi. Lametna kici khempeuh beita hi. Sihna Hell sungah a tawntung gimna i thuak ding longal adang bangmah om nawnlo hi. Ahi zongin itna tawh a kidim Pa Pasian in leitung mite pen leivui tawh ka bawl hi a, thanemna nei uh ahih manin mawhna sung a tung kha uh ahi hi.
Tua ahih manin dawi mangpa' khut sung pan amaute a honkhia dingin ka Tapa ka sawl ding hi, ci-in a Tapa leitungah hong sawlin hong honkhiasak hi. Kawlte in aiGarsmvQifaiGESifhvdkuf? avSarsmvQifavSESifhvkduf a cih mah bangin mihing te'n itaan i mansuah kha nuntakna pen Topa Jesu in a nuntakna tawh hong deihsak ahih manin kha nuntakna a ngahkik ihi hi.
Pasian in leitung mite' tungah bangzah takin itna hong nei cih i mu hi.
TANGTHU
Nidang lai-in American gam khuapi sung khat ah lei minthang mahmah khat om hi. Tua lei nuai-ah tembaw a pai nop ciangin kilamtosak a, meileng a pai nop ciangin lei kikhiasuk zel hi. Tua lei pen Mr.John a kici engineer khat in uk hi.
Sani sang khak ni khat Mr.John' tapa in a pa' nasepna ah hong pai-in set innpi sungah bawlung khat tawh kimawlin om hi. Tua banga a om laitakin meileng in a gamla muh khopna panin hon hong tum hi. Mr.John in leipi khiasuk leh tapa khat a neih setpi in gawizan dinga, lei khiasuk kei lehlah meileng le meileng sunga tuang khualzin mi khempeuh gunpi sung kidenna-in a vekpi-un simang khin ding hi. Meileng hong nai tektek ta a, a tapa set inn sungah kimawlin nuamsa mahmah a a om lam Mr.John in a muh ciangin lungkham lua kisa-in a khua-ul nel bang kaikeei ta hi. Meileng en zel, a tapa en zelin lei a khiatsuk ding le a khiatsuk loh ding khentat hak hong sa mahmah hi. Meileng lah lei gei a tung ding hipet mah ta a, lei lah kikhupsuk tuan nai peuhmah lo a om meileng tunga tuang khualzinte in a muh uh ciangin lau lua-in awng ngeingai uh hi. Tua laitakin Mr.John in, ]]Bang bang hita leh mi tampi a sih sangin ka tapa si zaw mai ta hen}} ci-in mitsi miaimuai kawmin lei damdamin hong khiasuk diaidiai ta hi. Tua ciangin a tapa in, ]]Pa…pa…pa aw, hong hon o}} ci a, a tapa otna aw hong za ciaiciai ta hi. Setpi in a tapa gawizan zihziahin set sung khempeuh si le nai tawh kidim hi. Lei a kikhiatsuk ciangin meileng nuamtakin pai-a, khualzin mite lungdam thei mahmah uh hi. Ahi zongin lei ukpa Mr.John a hih leh a tapa a sihsuah manin bang zahin dahin lungleng khaungai-in om ding cih pen mangmatin zong nei kha lo uh hi.
Lei ukpa Mr. John in Pasian hi a, a tapa in Topa Jesu ahi hi. Meileng in leitung hi a, khualzin mite in ei leitung mite ihi hi.
Fr. Peter Thawng Mung