Nu leh Pa te Pawini. ( Parents’ Day ) July 26.2023

Catholic Pawlpi adingin Nu leh Pa te Pawini cih pen Tonu Maria ii Nu leh Pa ahi, Misiangtho Joachim leh Anna te pawini ahi hi.
Pasian thukham sunga “na Nu na Pa zahtak in” cih thupiak zuihna in kum khat sungah nikhat pen Nu leh Pa te ading thungetsak diak ding ni-in Pawlpi in ciamtehin hong bawlsak hi.
Pasian thukham nam (10) sungah Pasian tawh kisai thukham leh mihing tawh kisai thukham ci-in nam nih hong pia hi.
Tua thukham nam nihte sung pan a lianpen thukham in “Topa na Pasian in hong piak gam ah na khan a sau theih na dingin na Nu leh na Pa zahtak in” (Exo 20: 12) cih thukham ahi hi. Pasian aum mite adingin Nu leh Pa zahtakna in nuntak tawntungna ngah nading lampi khat ah kihel hi.
Ta te theih huai thu nam (7)
1. Nu leh Pa ih cihin tanu tapa te adingin Pasian piak amanphapen thupha ahi hi.
2. Nu leh Pa ih cihin tanu tapa te adingin nuntakna hong pia te ahi uh hi.
3. Nu leh Pa ih cihin tanu tapate adingin Pasian’ palaite ahi uh hi.
4. Nu leh Pa ih cihin tanu tapate adingin Pasian dinmun (tangmi) alate ahi uh hi.
5. Nu leh Pa ih cihin tanu tapate adingin ahoihpen leh amasa pen sia te ahi uh hi.
6. Tanu tapa te in Nu leh Pa te’ lungtang ahi hi.
7. Tanu tapate in Joseph leh Maria te lamlahna nuai ah aom naupang Jesu ettehin Nu leh Pate tungah bawl ding tate vaipuakte picingtakin sep ding ahi hi.
“Na Nu na Pa zahtakin.” (Mt 15: 4)
July 26 ni-in a damlai hitaleh hong nusia sa Nu leh Pa te tungah lungdam koh ding ni thupi ahih banah na Nu na Pa zahtak un cih thukham teci lahna ni zong ahi hi.
July 26 ni-in Nu leh Pa te in tu leh ta te thupha piak ding ni thupi khat ahi hi.
Nu leh Pa te khempeuh tungah cidamna, lungnopna thupha te Topa’n hong pia kimciat ta hen.